Kolkata Doctor Murder Case : ఆత్మహత్య కథనాన్ని ఎవరు సృష్టించారు.? టీఎంసీ ఎంపీ ప్ర‌శ్న‌లు

కోల్‌కతాలోని ఆర్‌జి కర్ మెడికల్ కాలేజ్ అండ్ హాస్పిటల్‌లో ట్రైనీ డాక్టర్ హత్య కేసు (కోల్‌కతా డాక్టర్ మర్డర్ కేసు) బెంగాల్‌లోనే కాదు యావత్ దేశాన్ని ఉడికిస్తోంది. ఈ విషయంలో మమత ప్రభుత్వంపై అనేక ప్రశ్నలు తలెత్తుతున్నాయి. ప్రతిపక్షాలతో పాటు ఇప్పుడు సొంత పార్టీ నేతలు కూడా ప్రభుత్వాన్ని ప్రశ్నిస్తున్నారు.

టీఎంసీకి చెందిన రాజ్యసభ ఎంపీ సుఖేందు శేఖర్ రాయ్ మమత ప్రభుత్వంపై పలు ప్రశ్నలు సంధించారు. రెండు రోజుల క్రితం ఆర్‌జి కర్ హాస్పిటల్ ప్రిన్సిపాల్ సందీప్ ఘోష్‌ను తొలగించడంలో జాప్యంపై ప్రశ్నలు సంధించిన ఆయ‌న‌.. ఇప్పుడు పోలీస్ కమీషనర్, మాజీ ప్రిన్సిపల్‌పై దృష్టి సారించారు.

కోల్‌కతా ట్రైనీ డాక్ట‌ర్‌ హత్య కేసును నిష్పక్షపాతంగా సీబీఐ దర్యాప్తు చేయాలని సుఖేందు సోషల్ మీడియా ప్లాట్‌ఫామ్ ఎక్స్‌లో ప్రశ్నలు లేవనెత్తారు. ముందుగా పోలీస్ కమీషనర్, మెడికల్ కాలేజీ మాజీ ప్రిన్సిపాల్‌లను అదుపులోకి తీసుకుని ఆత్మహత్య కథనాన్ని ఎవరు సృష్టించారు, ఎందుకు సృష్టించారనే దానిపై విచారణ జరపాలని అన్నారు.

మమత ప్రభుత్వంపై టీఎంసీ ఎంపీ సుఖేందు త‌న వ్య‌తిరేక‌ వైఖరిని అవలంబిస్తున్నారు. ఆగస్టు 14న డాక్టర్ల నిరసనకు ఆయన మద్దతు తెలిపారు. బెంగాల్‌లోని లక్షలాది కుటుంబాల మాదిరిగానే నాకు కూడా ఒక కుమార్తె ఉందని.. వారికి అండగా ఉంటానని అన్నారు. కోల్‌కతా మహిళలకు అత్యంత సురక్షితమైన ప్రాంత‌మ‌న్న‌ భావనను ఈ ఘటన తోసిపుచ్చిందని ఆయన అన్నారు.

ఆగస్టు 9న ఆర్‌జి కర్ మెడికల్ కాలేజీ అండ్ హాస్పిటల్‌లోని సెమినార్ హాల్‌లో మహిళా ట్రైనీ డాక్టర్ మృతదేహం లభ్యమైంది. ఈ కేసులో ప్రమేయం ఉందని ఆరోపిస్తూ మరుసటి రోజు ఒక వ్య‌క్తిని అరెస్టు చేశారు. ఆ త‌ర్వాత ఇందులో మరికొంత మంది ప్రమేయం ఉన్నట్లు అనుమానిస్తున్నారు. నిందితులను వీలైనంత త్వరగా శిక్షించాలని.. బాధితురాలి పోస్టుమార్టం నివేదికను బహిర్గతం చేయాలని జూనియర్ డాక్టర్లు డిమాండ్ చేస్తున్నారు. హైకోర్టు సూచనల మేరకు సీబీఐ ఈ కేసును విచారిస్తుంది.