Encounter : జమ్మూలో ఇద్దరు ఉగ్రవాదులు హతం.. భారీగా ఆయుధాలు స్వాధీనం

జమ్మూకశ్మీర్‌లోని నౌషేరాలోని నియంత్రణ రేఖ (ఎల్‌ఓసి)లో అప్రమత్తమైన ఆర్మీ సిబ్బంది ఉగ్రవాదుల చొరబాటు ప్రయత్నాన్ని భగ్నం చేసింది. నియంత్రణ రేఖ దాటి భార‌త భూభాగంలోకి చొరబడిన ఇద్దరు ఉగ్రవాదులను సైనికులు హతమార్చారు. ఉగ్రవాదుల నుంచి రెండు ఏకే-47, ఒక పిస్టల్‌తో సహా భారీ మొత్తంలో ఆయుధాలను స్వాధీనం చేసుకున్నారు.

చొరబాటు ప్రయత్నాల గురించి ఇంటెలిజెన్స్ ఏజెన్సీలు, పోలీసుల నుండి అందిన సమాచారం ఆధారంగా.. సెప్టెంబర్ 8-9 రాత్రి లామ్ సెక్టార్‌లో చొరబాటు నిరోధక ఆపరేషన్ ప్రారంభించినట్లు ఆర్మీకి చెందిన జమ్మూకి చెందిన వైట్ నైట్ కార్ప్స్ ట్విట్టర్‌లో ఒక పోస్ట్‌లో తెలిపింది. సెర్చ్ ఆపరేషన్‌లో ఇద్దరు ఉగ్రవాదులు హతమయ్యారు. వారి నుంచి రెండు ఏకే-47లు, ఒక పిస్టల్‌తో సహా భారీ మొత్తంలో ఆయుధాలను స్వాధీనం చేసుకున్నట్లు తెలిపారు.

ఎన్‌కౌంటర్ తర్వాత సైనికులు ఆ ప్రాంతంపై రాత్రంతా గట్టి నిఘా ఉంచారని ఆర్మీ అధికారులు తెలిపారు. తెల్లవారుజామున సెర్చ్ ఆపరేషన్ ప్రారంభించారు. జమ్మూ కాశ్మీర్‌లో సెప్టెంబర్ 18 నుండి ప్రారంభమయ్యే అసెంబ్లీ ఎన్నికలకు ముందు భద్రతా సంస్థలు అప్రమత్తంగా ఉన్నాయి.