Wonder laa Park Offer : వండర్‌ లా పార్క్‌ అద్భుత ఆఫర్‌.. మే 13న ఓటేస్తే ఎంత డిస్కౌంటో తెలుసా

హైదరాబాద్‌లోని వండర్‌ లా పార్క్‌(Wonderlaa Park) భారీ ఆఫర్‌ను(Offer) ప్రకటించింది. మే 13న జరుగుతున్న ఎంపీ ఎన్నికల్లో(MP election) ఓటు వేసినవారికి పార్క్‌ టికెట్లపై 20 శాతం డిస్కౌంట్‌ను ప్రకటించింది. ఈ ఎన్నికల్లో ప్రజలు భారీ ఎత్తున ఓట్లు(Vote) వేయాలన్న ఉద్దేశంతోనే ఈ ఆఫర్‌ను ప్రకటించినట్లు వండర్‌ లా పార్క్‌ నిర్వాహకులు చెప్తున్నారు. మే 13న లోక్‌సభ ఎన్నికల్లో ఓటు వేసినవారంతా మూడు రోజుల పాటు ఈ ఆఫర్ పొందొచ్చు. గతంలో ఇలాంటి ఆఫర్‌నే బెంగళూరులోని వండర్‌లా పార్కు అందించింది. ఎన్నికల్లో ఓటు వేసినవారు తమ వేలికి ఉన్న ఇంక్ గుర్తు చూపించి మే 13, 14, 15 తేదీల్లో హైదరాబాద్‌లోని వండర్‌లా పార్క్‌లో 20 శాతం డిస్కౌంట్‌ పొందవచ్చని తెలిపింది. ఆన్‌లైన్‌తో పాటు పార్క్ టికెట్ కౌంటర్లలో కొనే టికెట్లకు కూడా ఈ ఆఫర్ వర్తిస్తుందని వండర్‌లా ప్రకటించింది. ప్రజలందరూ ఓటు వేసి ఈ ఆఫర్ పొందాలని వండర్‌లా కోరుతోంది. ఆఫర్ పూర్తి వివరాలు చూస్తే ఓటు వేసినవారు ఇంక్ గుర్తు చూపించి పార్క్ టికెట్స్‌పై 20 శాతం తగ్గింపు పొందొచ్చు. అంతేకాకుండా ఫుడ్ కాంబోలపైనా 20 శాతం తగ్గింపు ఉంటుందని తెలిపింది. ఈ ఆఫర్ హైదరాబాద్‌లోని వండర్‌లా పార్క్‌లో మాత్రమే లభిస్తుంది. అయితే వండర్‌లా మరికొన్ని ఆఫర్స్ కూడా ప్రకటించింది.

ఇక మరో ఆఫర్‌ విషయానికొస్తే మేలో పుట్టిన రోజు జరుపుకుంటున్నవారు ఒక వండర్‌లా టికెట్ కొంటే మరొకటి ఉచితంగా ఇస్తోంది. మే నెలలో పుట్టినవారందరూ ఈ ఆఫర్ పొందే అవకాశం ఉందని తెలిపింది. ఈ ఆఫర్‌ మాత్రం హైదరాబాద్‌లోని వండర్‌లాతో పాటు బెంగళూరు, కొచ్చిలోని వాటర్ పార్క్స్‌లో కూడా ఉంది. 2024 మే 31 వరకు ఈ ఆఫర్ లభిస్తుంది. ఆన్‌లైన్‌లో, పార్క్ టికెట్ కౌంటర్ల దగ్గర కొనే టికెట్లకు ఈ ఆఫర్ వర్తిస్తుంది. ఇక వండర్‌లా ఇప్పటికే ఆర్‌టీసీ ప్రయాణికులకు ప్రత్యేక ఆఫర్ ప్రకటించిన సంగతి తెలిసిందే. హైదరాబాద్‌లోని వేర్వేరు ప్రాంతాల నుంచి టీఎస్ఆర్‌టీసీ బస్సులో వండర్‌లా వెళ్తే పార్క్ ఎంట్రీ టికెట్స్‌పై 15 శాతం తగ్గిస్తోంది.