KTR : కేటీఆర్‌పై రెండు కేసులు.. త్వరలో అరెస్ట్‌ తప్పదా..?

బీఆర్ఎస్ వర్కింగ్ ప్రెసిడెంట్, మాజీ మంత్రి కేటీఆర్‌పై కేసులు పెట్టారు పోలీసులు. ఆయనపై నకిరేకల్(Nakrekal) పోలీస్‌స్టేషన్‌లో రెండు కేసులు నమోదయ్యాయి. నకిరేకల్‌ పట్టణంలో పదో తరగతి తెలుగు పేపర్‌ లీక్‌ అయిందంటూ సోషల్‌ మీడియాలో తప్పుడు ప్రచారం చేశారంటూ కేటీఆర్‌(KTR)పై మున్సిపల్‌ చైర్‌పర్సన్‌ చౌగోని రజిత, కాంగ్రెస్ నేతలు ఫిర్యాదు చేశారు. ఈ ఫిర్యాదుతో నకిరేకల్ పోలీసులు కేటీఆర్‌తో పాటు సోషల్‌ మీడియా ఇంచార్జి మన్నె క్రిశాంక్‌, కొణతం దిలీప్‌ కుమార్‌(Dileep Kumar)లపై కూడా రెండు వేర్వేరు కేసులు నమోదయ్యాయి. పేపర్ లీక్ అయిందంటూ వెబ్‌సైట్‌లో వచ్చిన వార్తను వాస్తవాలు తెలుసుకోకుండా కేటీఆర్‌ సోషల్ మీడియా ప్లాట్‌ఫాం 'X'లో షేర్‌ చేశారని ఆ ఫిర్యాదులో తెలిపారు. అయితే పేపర్ లీకేజీ వ్యవహారంలో పోలీసులు ఇప్పటి వరకు ఒక మైనర్‌ బాలికతో పాటు ఐదుగురిని అరెస్ట్‌ చేశారు. మరో ఆరుగురు పరారీలో ఉన్నారని పోలీసులు వెల్లడించారు. మరి పేపర్‌ లీకైందని మీరే అరెస్ట్‌ చేస్తారు.. మరోవైపు ఆ వార్తను సోషల్‌ మీడియాలో షేర్‌ చేశారని కేటీఆర్‌, క్రిషాంక్, దిలీప్‌పై కేసులు ఎలా పెడతారని నెటిజన్లు ప్రశ్నిస్తున్నారు.