Telangana : రాజధాని ప్రాంతంలో నాల్గవ నగరం.. ముచ్చర్ల..!

హైదరాబాద్, సికింద్రాబాద్, సైబరాబాద్ తర్వాత మెట్రో కనెక్టివిటీతో సహా ప్రపంచ స్థాయి మౌలిక సదుపాయాలతో రాజధాని ప్రాంతంలో నాల్గవ నగరంగా ముచ్చెర్ల అభివృద్ధి చెందుతుందని ముఖ్యమంత్రి ఎ రేవంత్ రెడ్డి అన్నారు. ముచ్చెర్లలో స్కిల్ యూనివర్శిటీని ప్రారంభిస్తున్నామని, నైపుణ్యం, సెమీ స్కిల్డ్ కార్మికులకు శిక్షణ ఇచ్చేందుకు హైటెక్ సిటీలోని నేషనల్ అకాడమీ ఆఫ్ కన్‌స్ట్రక్షన్‌ను ముచ్చెర్లకు తరలిస్తున్నట్లు తెలిపారు. దీంతో అంద‌రి దృష్టి ఆ గ్రామంపైనే ప‌డింది. రంగారెడ్డి జిల్లాలో ముచ్చర్ల గ్రామం ఉంది. ఇది శంషాబాద్ ఎయిర్​పోర్టుకు 30 కిలోమీటర్ల లోపే ఉంది.

ముచ్చెర్ల ప్రాంతంలో ఇప్పటికే రియల్ ఎస్టేట్ కంపెనీలు వెంచర్లు వేశాయి. ఫాంహౌస్​లు, విల్లాల నిర్మాణం కూడా ఊపందుకుంది. పారిశ్రామికంగా చాలా వేగంగా డెవలప్​ అవుతోంది. ఓఆర్ఆర్, శంషాబాద్​ఎయిర్​పోర్టు, నేషనల్​హైవేను ఆనుకుని ఉండడంతో అభివృద్ధిలో మరింత వేగంగా అబివృద్ధి చెందే అవకాశాలు ఉన్నాయని అధికారులు, నిపుణులు చెబుతున్నారు.

ముచ్చెర్ల ప్రాంతానికి ద‌గ్గ‌ర‌లోనే చిన జీయర్ హోమియో మెడికల్ కాలేజీ, మాజీ ఉప రాష్ట్రపతి వెంకయ్యనాయడుకి చెందిన స్వర్ణ భారత్​ట్రస్ట్, పర్యాటక కేంద్రంగా మారిన స్టాచ్యూ ఆఫ్ ఈక్వాలిటీ ఉన్నాయి. ముచ్చెర్లను పూర్తిస్థాయిలో డెవలప్​చేస్తే దక్షిణ తెలంగాణ రూపం మారుతుందని నిపుణులు అంచనా వేస్తున్నారు.

బుధవారం అసెంబ్లీలో చర్చ సందర్భంగా సీఎం పలు కొత్త ప్రాజెక్టులను ప్రకటించారు. గురువారం ఇక్కడ స్పోర్ట్స్ యూనివర్సిటీకి సీఎం శంకుస్థాపన చేయనున్నారు. అంతర్జాతీయ గోల్ఫ్ కోర్టు, స్పోర్ట్స్ యూనివర్సిటీ, స్టేడియం నిర్మిస్తామని సీఎం ప్రకటించారు. ఎయిర్​పోర్టు నుంచి ముచ్చర్లకు మెట్రో రైలును విస్తరిస్తామని చెప్పారు..

1,000 ఎకరాల్లో హెల్త్ టూరిజం హబ్, స్పోర్ట్స్ యూనివర్సిటీ ఏర్పాటు చేస్తామన్నారు. కార్పొరేట్ ఆసుపత్రులే కాకుండా పేదలకు అన్ని రోగాలకు వైద్యం చేయించుకునే సౌకర్యాలు ఉంటాయన్నారు.

రాష్ట్ర ప్రభుత్వం క్రీడలు, క్రీడలను పెద్దఎత్తున ప్రోత్సహించాలన్నారు. చిన్న దేశాల క్రీడాకారులు బంగారు పతకాలు సాధిస్తుంటే.. మన వాళ్లు మాత్రం కాంస్య పతకాన్ని సాధించి సంబరాలు చేసుకుంటున్నారు. గతంలో నగరంలో ఆఫ్రో ఏషియన్‌ క్రీడలు నిర్వహించేవారని.. అభివృద్ధి చేసిన మౌలిక వసతులు వినియోగించుకోకుండా వదిలేస్తే.. తాగుబోతులకు అడ్డాగా మారాయని ఆవేదన వ్యక్తం చేశారు.

హైదరాబాదీ పేస్ బౌలర్ మహ్మద్ సిరాజ్, బాక్సర్ నిఖత్ జరీన్ లకు గ్రూప్-1 ఉద్యోగాలు ఇవ్వాలని రాష్ట్ర ప్రభుత్వం నిర్ణయించిందని అన్నారు. ఇక్కడ అంతర్జాతీయ ప్రమాణాలతో క్రికెట్ స్టేడియం నిర్మాణం కోసం బోర్డ్ ఆఫ్ కంట్రోల్ ఫర్ క్రికెట్ ఇన్ ఇండియా (బీసీసీఐ)తో మాట్లాడాను అని తెలిపారు.

ఫార్మాసిటీ కోసం సేకరించిన భూములను తిరిగి ఇవ్వాలని బీఆర్‌ఎస్‌ వర్కింగ్‌ ప్రెసిడెంట్‌ కేటీఆర్‌ డిమాండ్‌ చేయడంపై స్పందిస్తూ.. ఒకేచోట కాలుష్యకారక పరిశ్రమలు ఏర్పాటు చేస్తే పరిస్థితి మరింత దిగజారుతుందని అన్నారు. ఫార్మా సిటీ భూములను ఇతర అవసరాలకు వినియోగించడం వల్ల తలెత్తే న్యాయపరమైన చిక్కుల గురించి ఆయన సమాధానమిస్తూ.. ఆ భూములను ఫార్మా, అనుబంధ పరిశ్రమల ఏర్పాటుకు వినియోగిస్తామని నోటిఫికేషన్‌లో స్పష్టంగా పేర్కొన్నారు. గత ప్రభుత్వం ఆజామాబాద్‌ పారిశ్రామిక ప్రాంత భూములను ఇతర అవసరాలకు వినియోగించుకుందని తెలిపారు.

“గత ప్రభుత్వం ఫార్మా సిటీని ప్రతిపాదించింది. ఇప్పుడు మేము ఫార్మా గ్రామాలను ప్లాన్ చేస్తున్నాము. జీనోమ్ వ్యాలీలో కాలుష్యం లేని ట్యాబ్లెట్ ఉత్పత్తి యూనిట్లు, ఆర్‌అండ్‌డి యూనిట్ల మాదిరిగా ఇక్కడ కూడా 4 వేల ఎకరాల్లో యూనిట్లు ఏర్పాటు చేయవచ్చని.. 200 ఎకరాల్లో ఆర్టిఫిషియల్ ఇంటెలిజెన్స్ హబ్ కూడా ఏర్పాటు చేస్తామని రేవంత్ రెడ్డి చెప్పారు.

రాష్ట్ర ప్రభుత్వం అగ్రికల్చర్ పాలసీ, స్పోర్ట్స్ పాలసీ, ఏఐ పాలసీ, ఐటీ అండ్ ఇండస్ట్రీస్ పాలసీ, ఎనర్జీ పాలసీని రూపొందిస్తుందని, ధరణి సమస్యల పరిష్కారానికి ఒక విధానాన్ని రూపొందిస్తున్నామని ముఖ్యమంత్రి తెలిపారు.