HYDRAA హైడ్రా పేరు చెప్పి బెదిరింపులు.. హెచ్చరికలు జారీ
ఎవరైనా వ్యక్తులను బెదిరించి డబ్బులు వసూలు చేస్తే జైలు
ఎవరైనా వ్యక్తులను బెదిరించి డబ్బులు వసూలు చేస్తే జైలు శిక్షతో పాటు కఠిన చర్యలు తీసుకుంటామని హైదరాబాద్ డిజాస్టర్ రెస్పాన్స్ అండ్ అసెట్స్ ప్రొటెక్షన్ ఏజెన్సీ (హైడ్రా) కమిషనర్ ఏవీ రంగనాథ్ హెచ్చరించారు. సామాజిక కార్యకర్తల ముసుగులో కొందరు వ్యక్తులు బిల్డర్ల వద్దకు వచ్చి నిర్మాణాలు ఫుల్ ట్యాంక్ లెవల్ లేదా చెరువుల బఫర్ జోన్‌లో ఉన్నాయని బ్లాక్‌మెయిల్ చేస్తున్నారు. ఏజెన్సీలోని సీనియర్ అధికారులతో సన్నిహిత సంబంధాలు ఉన్నాయని, హైడ్రాకు ఫిర్యాదు చేస్తామని బిల్డర్లను బెదిరిస్తున్నారని కమిషనర్ తెలిపారు. “ఎత్తైన నిర్మాణాలలో నివసించే గృహాల ఓనర్లను కూడా సంప్రదిస్తున్నారు. హైడ్రాను ప్రభావితం చేయగలమని, మీ ఆస్తులపై ఎటువంటి చర్య తీసుకోనివ్వమని పేర్కొంటూ డబ్బు డిమాండ్ చేస్తున్నారు, ”అని రంగనాథ్ అన్నారు. అలాంటి వారిని నమ్మవద్దని హైడ్రా కమిషనర్ ప్రజలను కోరారు. ఎవరైనా వ్యక్తులు, రెవెన్యూ, మున్సిపల్ అడ్మినిస్ట్రేషన్, ఇరిగేషన్, ఇతర శాఖల అధికారులు డబ్బు డిమాండ్ చేస్తే పోలీసులకు, ACB లేదా HYDRAA కి ఫిర్యాదు చేయవచ్చని సూచించారు.
