Zero Shadow Day : హైదరాబాద్‌లోనూ జీరో షాడో డే! 9న రెండు నిమిషాల పాటు నీడ మాయం!

మొన్న బెంగళూరు(Bengaluru) నగరంలో జీరో షాడో డే (Zero Shadow day) ఏర్పడింది కదా! నీడనే మాయమయ్యే ఆ అద్భతం మన దగ్గర కూడా జరిగితే బాగుండేది అని అనుకున్నాం కదా! సూర్యుడు మన మొర ఆలకించాడు కాబోలు. ఈ నెల 9న ఆ అందమైన అనుభవాన్ని మనకు అందించబోతున్నాడు. హైదరాబాద్‌(Hyderabad)లో 9వ తేదీన మధ్యాహ్నం సరిగ్గా 12. 12 గంటల సమయంలో కాసేపు మన నీడ మనకు కనిపించదు. అంటే జీరో షాడో డే ఏర్పడనుందన్నమాట! ఈ విషయాన్ని బి.ఎం.బిర్లా సైన్స్‌ సెంటర్‌ టెక్నికల్‌ అధికారి ఎన్‌.హరిబాబుశర్మ తెలిపారు. ఆ సమయంలో హైదరాబాద్‌లో సూర్య కిరణాలు నిట్టనిలువుగా పడతాయన్నారు. అప్పుడు ఎండలో నిటారుగా అంటే 90 డిగ్రీల కోణంలో ఉంచిన ఏ వస్తువు నీడా పడదని తెలిపారు. 12:12 నుంచి 12:14 వరకు రెండు నిమిషాల పాటు నీడ కనిపించదన్నారు. ఇలాగే మళ్లీ ఆగస్టు 3వ తేదీన కూడా జీరో షాడో డే ఏర్పడుతుందని చెప్పారు.