Rain In Telangana: తెలంగాణలో మెరుపులతో కూడిన వర్షం.. ఇంకెన్ని రోజులు వర్షాలు ఉన్నాయంటే?

శుక్రవారం నగర శివార్లలో కురిసిన భారీ వర్షంతో తూములూరు-కందుకూరు మధ్య శ్రీశైలం హైవేపై నాలుగు గంటలపాటు ట్రాఫిక్ జామ్ అయింది. భారీ వర్షం, మెరుపులతో పాటు ఈదురు గాలుల కారణంగా రహదారిపై కొన్ని చెట్లు పడిపోయాయి, ట్రాఫిక్‌ను క్లియర్ చేయడానికి పోలీసులు రంగంలోకి దిగారు. సిద్దిపేట, నిజామాబాద్, కామారెడ్డి, సంగారెడ్డి జిల్లాల్లోని పలు ప్రాంతాల్లో ఉరుములు, ఈదురు గాలులతో కూడిన వర్షం పడింది. కామారెడ్డి జిల్లా సోమారంపేట, రత్నగిరిపల్లి, నెమలిగుట్ట తండా, బంజేపల్లి గ్రామాల్లో వడగళ్ల వానతో వరి, మొక్కజొన్న తదితర పంటలు దెబ్బతిన్నాయి. సంగారెడ్డి జిల్లాలోని జహీరాబాద్‌, కోహీర్‌, ఝరాసంగం తదితర ప్రాంతాల్లో శుక్రవారం వర్షం కురిసింది. జహీరాబాద్ పట్టణంలోని లోతట్టు కాలనీలు కూడా వర్షపునీటితో జలమయమయ్యాయి. రానున్న మూడు రోజుల్లో తెలంగాణలోని కొన్ని జిల్లాల్లో తేలికపాటి నుంచి మోస్తరు వర్షాలు కురిసే అవకాశం ఉందని భారత వాతావరణ శాఖ అంచనా వేసింది.

హైదరాబాద్ నగరంలో కూడా భారీ వర్షం కురిసింది. హైదరాబాద్ లోని అనేక ప్రాంతాల్లో వర్షం కురియడంతో నగరవాసులకు ఎండవేడిమి, ఉక్కపోత నుంచి ఉపశమనం కలిగింది.