Extramarital Affair In Hyderabad : ఇద్దరు ప్రియులతో వివాహేతర సంబంధం.. ఓ ప్రియుడితో కలిసి మరో ప్రియుడి హత్య

వివాహేతర సంబంధంతో ఓ క్యాబ్‌ డ్రైవర్‌ దారుణ హత్యకు గురయ్యాడు. మేడిపల్లి పోలీస్‌ స్టేషన్‌ పరిధిలో ఈ దారుణం జరిగింది. పోలీసులు వెల్లడించిన వివరాల ప్రకారం. పీర్జాదిగూడలోని మల్లికార్జుననగర్‌లో పద్మ(40) అనే మహిళ అనురార్‌ రెడ్డి బాయిస్‌ హాస్టల్‌ నడుపుతోంది. ఈ హాస్టల్‌లో ఓ క్యాబ్ డ్రైవర్‌ ఉండేవాడు. జనగామ జిల్లా బండ్లగూడెం గ్రామానికి చెందిన క్యాబ్‌ డ్రైవర్‌ మహేందర్‌ రెడ్డి (38)కి పద్మ(Padma)తో పరిచయం ఏర్పడింది. ఈ ఇద్దరి పరిచయం వివాహేతర సంబంధానికి దారి తీసింది. అయితే గత కొంత కాలంగా ఇద్దరి మధ్య వివాదాలు రావడంతో మహేందర్‌ రెడ్డి హాస్టల్‌ నుంచి వెళ్లిపోయాడు. అయితే అప్పుడప్పుడు మళ్లీ హాస్టల్‌కు వచ్చేవాడు. ఈ నేపథ్యంలో శుక్రవారం హాస్టల్‌కు రావాలని పద్మ మహేందర్‌రెడ్డిని పిలిచింది. అయితే మహేందర్‌రెడ్డి శనివారం రాత్రి హాస్టల్‌కు వెళ్లాడు. అదే సమయంలో ఓ గదిలో సూర్యాపేటకు చెందిన కిరణ్‌రెడ్డి(Kiran reddy), పద్మ కలిసి ఉన్నారు. దీంతో ముగ్గురి మధ్య ఘర్షన చెలరేగింది. ఈ గొడవలో కిరణ్‌రెడ్డి, పద్మ కత్తి, గరిటతో మహేందర్‌రెడ్డి(Mahendar reddy)పై దాడి చేశారు. తీవ్రంగా గాయపడ్డ మహేందర్‌రెడ్డి అక్కడికక్కడే మృతి చెందాడు. సమాచారం అందుకున్న పోలీసులు ఘటనాస్థలికి చేరుకుని మృతదేహాన్ని గాంధీ ఆస్పత్రికి తరలించి నిందితులను అదుపులోకి తీసుకున్నారు.