KTR : చారాణ కోడికి.. బారాణ మసాలా

తెలంగాణలో కాంగ్రెస్‌(Telangana Congress) సర్కార్‌పై బీఆర్‌ఎస్‌(BRS) వర్కింగ్‌ ప్రెసిడెంట్‌ కల్వకుంట్ల తారకరామరావు(KTR) మరోసారి విరుచుకుపడ్డారు. రుణమాఫీపై(Runamafi) రైతుల్లో గందరగోళం నెలకొందని విమర్శించారు. రుణమాఫీతో సంతోషంగా ఉన్న రైతుల కంటే బాధగా ఉన్న రైతులే అధికంగా ఉన్నారన్నారు. 40 లక్షల మందిలో మెజారిటీ రైతులకు నిరాశే మిగిల్చినందుకా ? లేక ముప్ఫై లక్షల మందిని మోసం చేసినందుకా? సంబరాలు అని నిలదీశారు. రుణమాఫీ అమలు, దానిపై కాంగ్రెసోళ్ల తీరు చూస్తుంటే తెలంగాణలో ఓ సామెత గుర్తుకొస్తుందని ఆయన అన్నారు. “ చారాణ కోడికి..! బారాణ మసాలా...!! ”గా రుణమాఫీ తీరుందని ఆయన ఎక్స్‌ వేదికగా విమర్శలు గుప్పించారు.

కేటీఆర్‌ ట్వీట్‌లో ఇంకా ఏం రాశారంటే..!

‘సీఎం రేవంత్ రెడ్డి గారు...

ఊరించి.. ఊరించి..

ఏడునెలలు ఏమార్చి చేసిన..

మీ రుణమాఫీ తీరు చూస్తే..

తెలంగాణ ప్రజలకు గుర్తొచ్చిన సామెత ఒక్కటే..

“ చారాణ కోడికి..! బారాణ మసాలా...!! ”

రుణమాఫీ అయిన రైతులకన్నా..

కంటతడి పెట్టిన కుటుంబాలే ఎక్కువ

ప్రభుత్వం రూపొందించిన మార్గదర్శకాలు..!

రైతుమాఫీ పథకానికి మరణ శాసనాలైనై..!!

అన్నివిధాలా అర్హత ఉన్నా..

ఎందుకు రుణమాఫీ కాలేదో చెప్పెటోడు లేడు...

రైతులు గోడు చెప్పుకుందామంటే వినేటోడు లేడు...

అర్హులైన లబ్దిదారులు.. రుణమాఫీ కాక..

అంతులేని ఆందోళనలో ఉంటే ఎందుకీ సంబరాలు ?

నలభై లక్షల మందిలో..

మెజారిటీ రైతులకు నిరాశే మిగిల్చినందుకా ?

ముప్ఫై లక్షల మందిని మోసం చేసినందుకా ?

రెండు సీజన్లు అయినా..

రైతుభరోసా ఇంకా షురూ చెయ్యలే

జూన్ లో వేయాల్సిన రైతుభరోసా..

జూలై వచ్చినా రైతుల ఖాతాలో వెయ్యలే..!!

కౌలు రైతులకు..

ఇస్తానన్న రూ.15 వేలు ఇయ్యనే ఇయ్యలే..!!

రైతు కూలీలకు..

రూ.12 వేల హామీ ఇంకా అమలు చెయ్యలే..!!

మభ్యపెట్టే మీ పాలన గురించి..

ఒక్క మాటలో చెప్పాలంటే..

ఇంతకాలం.. అటెన్షన్ డైవర్షన్..!

ఇప్పుడేమో.. ఫండ్స్ డైవర్షన్..!!

జై తెలంగాణ