Javed Miandad : వ‌న్డే ప్రపంచకప్ కోసం పాకిస్థాన్ భార‌త్‌కు వెళ్లకూడదు

ఈ ఏడాది ఐసీసీ వన్డే ప్రపంచకప్(Odi World Cup) కోసం పాకిస్థాన్(Pakistan) పొరుగు దేశమైన భార‌త్‌(India)కు వెళ్లకూడదని ఆ దేశ‌ బ్యాటింగ్ దిగ్గజం జావేద్ మియాందాద్(Javed Miandad) విషం చిమ్మాడు. బీసీసీఐ(BCCI) ముందుగా తమ జట్టును పాకిస్థాన్‌కు పంపేందుకు అంగీకరించకపోతే.. పాకిస్థాన్ కూడా భారత్‌కు వెళ్లకూడదని ఆయన అన్నారు. ఐసీసీ రూపొందించిన వన్డే ప్రపంచకప్ ముసాయిదా షెడ్యూల్ ప్రకారం.. అక్టోబర్ 15న అహ్మదాబాద్‌లోని నరేంద్ర మోదీ స్టేడియం(Narendra Modi Stadium)లో పాకిస్థాన్ భారత్‌తో ఆడాల్సి ఉంది.

మియాందాద్ మాట్లాడుతూ.. పాకిస్థాన్ జట్టు 2012, 2016లో భారత్‌కు వెళ్లింది. ఇప్పుడు ఇక్కడికి రావడం భారతీయుల వంతు. నేను ఒక నిర్ణయం తీసుకుంటే.. ప్రపంచకప్(World Cup) లో స‌హా నేను ఏ మ్యాచ్ ఆడటానికి భారతదేశానికి వెళ్లను. మేము వారితో (భారతదేశం) ఆడటానికి ఎల్లప్పుడూ సిద్ధంగా ఉంటాము.. కానీ వారు ఎప్పుడూ అదే విధంగా స్పందించరు.

మియాందాద్ మాట్లాడుతూ.. 'పాకిస్థాన్ క్రికెట్(Pakistan Cricket) చాలా పెద్దది. ఇప్పటికీ మంచి ఆటగాళ్లను తయారు చేస్తున్నాం. కాబట్టి మనం భారత్‌కు వెళ్లకపోయినప్పటికీ.. దాని వల్ల మాకు ఎలాంటి మార్పు వస్తుందని నేను అనుకోను." 2008లో ఆసియా కప్(Asia Cup) కోసం భారత్ చివరిసారిగా పాకిస్థాన్‌లో పర్యటించింది. అప్పటి నుంచి ఇరు జ‌ట్ల‌ మధ్య చాలా కాలంగా గ‌ట్టి పోటీ ఉంది. రెండు దేశాల మ‌ధ్య‌ కొనసాగుతున్న రాజకీయ ఉద్రిక్తతల కారణంగా.. ద్వైపాక్షిక క్రికెట్ సంబంధాలు నిలిపివేయబడ్డాయి. క్రీడలను రాజకీయాలతో కలపకూడదని మియాందాద్ అభిప్రాయపడ్డాడు.

పరస్పర సహకారంతో జీవించడం మంచిది. క్రికెట్ అనేది ప్రజలను ఒకరికొకరిని దగ్గర చేసే ఆట.. దేశాల మధ్య అపార్థాలు.. మనోవేదనలను తొలగించగలదని నేను ఎప్పుడూ చెప్తానన్నారు. హైబ్రిడ్ మోడల్‌లో జరగనున్న ఆసియా కప్‌కు పాకిస్థాన్ ఆతిథ్యం ఇవ్వనున్న సందర్భంగా మియాందాద్ చేసిన ఈ ప్రకటన తెరపైకి వచ్చింది. ఈ మోడల్ ప్రకారం.. భారత్ తన అన్ని మ్యాచ్‌లను శ్రీలంక(Srilanka)లో ఆడనుంది. భారత్‌ను తీవ్రంగా విమర్శించే మియాందాద్‌కు ఈ నిర్ణయం నచ్చలేదు. ఆసియా కప్ కోసం బీసీసీఐ టీమిండియాను మళ్లీ పాకిస్థాన్‌కు పంపదని మేము భావిస్తున్నామని.. అందుకే మనం కఠినంగా వ్యవహరించాల్సిన సమయం ఆసన్నమైందని అన్నాడు.