T20 Series : దక్షిణాఫ్రికాలో తలపై బ్యాగులతో పరుగులు పెట్టిన టీమిండియా క్రికెట‌ర్లు..!

డిసెంబర్ 10 నుంచి భారత్-దక్షిణాఫ్రికా(IND vs SA) జట్ల మధ్య టీ20 సిరీస్(T20 Series) ప్రారంభం కానుంది. భారత్ వర్సెస్ సౌతాఫ్రికా మధ్య 3 టీ20లు, 3 వన్డేలు, ఒక టెస్టు మ్యాచ్ జరగనుంది. ఇందుకోసం భారత జట్టు దక్షిణాఫ్రికాకు చేరుకుంది. దక్షిణాఫ్రికాకు వెళ్లిన‌ జట్టులో సెల‌క్ట‌ర్లు ఎక్కువగా భారత యువ ఆటగాళ్లకు అవకాశం కల్పించారు. దక్షిణాఫ్రికాలో ఆటగాళ్లకు ఘనస్వాగతం లభించింది. దీనికి సంబంధించిన వీడియోను కూడా బీసీసీఐ విడుదల చేసింది.

బీసీసీఐ విడుదల చేసిన వీడియోలో ఆటగాళ్లందరూ చాలా సరదాగా ఉన్నారు. భారత జట్టు దక్షిణాఫ్రికా చేరుకున్నప్పుడు అక్కడ వర్షం కురుస్తోంది. ఈ సందర్భంగా ఆటగాళ్లు తలపై బ్యాగులు పెట్టుకుని పరుగులు తీస్తూ కనిపించారు. ఎయిర్‌పోర్ట్‌లో దిగిన తర్వాత.. బస్సు ఎక్కేందుకు తమను తాము రక్షించుకోవడానికి ఆటగాళ్లు తలపై బ్యాగులతో పరుగులు తీయడం కనిపించింది. ఈ సిరీస్‌కు భారత జ‌ట్టుకు కెప్టెన్‌ సూర్యకుమార్ యాదవ్ నాయకత్వం వహిస్తాడు. ఆస్ట్రేలియాపై స్వ‌దేశంలో సిరీస్ నెగ్గిన సూర్యకు ఈ సిరీస్ కూడా పెద్ద పరీక్షే అవుతుంది.

డిసెంబర్ 10న భారత్ వర్సెస్ సౌతాఫ్రికా మధ్య టీ20 సిరీస్ తొలి మ్యాచ్ జరగనుంది. రెండో మ్యాచ్ డిసెంబర్ 12న, మూడో మ్యాచ్ డిసెంబర్ 14న జరగనుంది. మూడు వన్డేల సిరీస్‌లో మొదటి మ్యాచ్ డిసెంబర్ 17న, రెండో మ్యాచ్ డిసెంబర్ 19న, మూడో మ్యాచ్ డిసెంబర్ 21న జరగనుంది. ఏకైక టెస్ట్ మ్యాచ్ డిసెంబర్ 26 - 30 తేదీల‌ మధ్య జరగనుంది. ఈ సిరీస్‌కు ముందు భారత జట్టు కోచ్ రాహుల్ ద్రవిడ్ మాట్లాడుతూ.. దక్షిణాఫ్రికా పిచ్ బ్యాటింగ్‌కు చాలా కష్టంగా ఉందని, అటువంటి పరిస్థితిలో మేము అందరినీ ఒకే విధంగా ఆడమని అడగలేము. ఆటగాళ్లందరిని స్వేచ్ఛగా వదిలేస్తాం.. తద్వారా వారు తమ సౌలభ్యం ప్రకారం జట్టుకు సహకరించగలరని పేర్కొన్నాడు.