Shahid Afridi : అహ్మదాబాద్ స్టేడియంలో భార‌త్‌-పాక్ వ‌న్డే వ‌ర‌ల్డ్ క‌ప్‌ మ్యాచ్‌.. పీసీబీపై షాహిద్ అఫ్రిది ఫైర్‌

ఆసియా కప్‌(Asia Cup)పై ఉత్కంఠ దాదాపుగా ముగిసింది. ఈ ఏడాది భారత్‌లో జరగనున్న వ‌న్డే ప్రపంచకప్‌కు సంబంధించి ఇప్పుడు చర్చ జ‌రుగుతుంది. అక్టోబర్ 15న అహ్మదాబాద్‌లోని నరేంద్ర మోదీ క్రికెట్ స్టేడియంలో భారత్-పాకిస్థాన్ మధ్య మ్యాచ్ జరగనుంది. అయితే ఈ మ్యాచ్‌ను అహ్మదాబాద్‌కు బదులుగా వేరే మైదానానికి మార్చాలని పీసీబీ కోరుతోంది. ఈ డిమాండ్‌పై పాకిస్థాన్ మాజీ ఆల్‌రౌండర్ షాహిద్ అఫ్రిది పీసీబీపై మండిపడ్డారు. అహ్మదాబాద్‌లో ఆడకూడదన్న పాకిస్థాన్ క్రికెట్ బోర్డు నిర్ణయం షాహిద్ అఫ్రిదికి అస్సలు నచ్చలేదు. ఓ స్థానిక ఛానెల్‌తో మాట్లాడిన అఫ్రిది తన సొంత దేశపు క్రికెట్‌ బోర్డుపై విరుచుకుపడ్డాడు.

ఆయ‌న‌ అహ్మదాబాద్‌ పిచ్‌పై ఆడటానికి ఎందుకు నిరాకరిస్తున్నారు? ఆ పిచ్ కాల్పులు జరుపుతోందా.. భయానకంగా ఉందా? వెళ్లి ఆడండి.. గెలవండి. మీరు అనుకుంటే.. ఇది సవాలుగా ఉంటుంది. సానుకూలంగా తీసుకోండి.. భారత జట్టుకు ఆ పిచ్ అనుకూలంగా ఉంటే.. మీరు అక్కడికి వెళ్లి వారి అభిమానుల ముందే వారిని ఓడించాలని వ్యాఖ్యానించాడు.

పాకిస్తాన్‌లో జరిగిన సమావేశానికి పీసీబీ ఛైర్మన్ నజీమ్ సేథీతో పాటు ఐసీసీ అధికారులు హాజరయ్యారు. ఈ భేటీలో అహ్మదాబాద్‌లోని నరేంద్ర మోదీ క్రికెట్ స్టేడియంలో ఆడేందుకు పీసీబీ చైర్మన్ నిరాకరించారు. అహ్మదాబాద్‌లో నాకౌట్ మ్యాచ్‌లు మాత్రమే ఆడేందుకు సిద్ధంగా ఉన్నట్లు పీసీబీ తెలిపింది. చెన్నై, బెంగళూరు, కోల్‌కతాలో తమ మ్యాచ్‌లు నిర్వహించాలని పాకిస్థాన్ క్రికెట్ బోర్డు కోరినట్లు నివేదిక‌లు చెబుతున్నాయి.