Illegal Weapons Video : నాటు తుపాకుల ఫ్యాక్టరీని పట్టించిన వీడియో!

మధ్యప్రదేశ్‌(Madhya Pradesh) చంబల్‌లోని మోరెనా(Morena) జిల్లాలో అక్రమంగా తుపాకుల ఫ్యాక్టరీని(Illegal weapons) ఓ వీడియో పట్టించింది. ఓ మహిళ నాటు తుపాకులు కడుగుతున్న వీడియో సోషల్‌ మీడియాలో(Social media) వైరల్‌ అయ్యింది. ఈ వీడియోలో ఆమె నాటు తుపాకులను(Guns) పాలిష్‌ పెట్టడానికి వాటికి బ్రష్‌ చేస్తున్న దృశ్యాలు ఉన్నాయి. ఈ వీడియో పోలీసుల కంటపడింది. అది చూసి వారు ఉలిక్కిపడ్డారు. నెమ్మదిగా ఆరా తీశారు. పక్కా ప్లానింగ్‌తో ఆపరేషన్‌ నిర్వహించారు. మహువా పోలీస్‌స్టేషన్‌ పరిధిలోని గణేశ్‌పుర గ్రామంలో ఈ ఫ్యాక్టరీ ఉన్నట్టు తెలుసుకున్నారు. ఆ ఫ్యాక్టరీపై దాడి చేశారు. ఆ మహిళ భర్త శక్తి కపూర్‌ శఖ్వార, ఆమె మామ బీహారీలాల్‌ను పోలీసులు అరెస్ట్‌ చేశారు. ఈ క్రమంలో పోలీసులు 315 బోర్‌ డబుల్‌ బ్యారెల్‌ గన్‌, 315 పిస్టోల్‌, 32 బోర్‌ పిస్టల్‌తో పాటు సగం తయారైన పలు ఆయుధాలను స్వాధీనం చేసకున్నారు. అక్రమ ఆయుధాల తయారీకి అవసరమైన పరికరాలు, పనిముట్లను అధికారులు సీజ్‌ చేశారు.

నిందితులు దాదాపు ఆరు నెలలుగా ఫ్యాక్టరీని నడుపుతున్నట్లు పోలీసుల విచారణలో తేలింది. అక్కడ తయారైన ఆయుధాలు ఎవరికి అమ్మారో తెలుసుకోవడానికి పోలీసులు ప్రయత్నిస్తున్నారు.