Uttar Pradesh:సాయం కోసం వెళితే తాంత్రికుడు అత్యాచారం చేశాడు

ఉత్తరప్రదేశ్‌(Uttar Pradesh)లోని అమ్రోహా(amroha)లో మరో షాకింగ్‌ ఘటన వెలుగులోకి వచ్చింది. చికిత్స కోసం యువతి ఓ తాంత్రికుడి దగ్గరకు వెళితే వాడు ఆమెపై అత్యాచారం చేయడమే కాకుండా అసభ్యకరమైన వీడియో తీశాడు. ఆ వీడియోను వైరల్‌ చేస్తానంటూ బెదిరిస్తూ సంవత్సర కాలంగా ఆమెపై లైంగిక దాడి చేస్తూనే వస్తున్నాడు. దాంతో పాటు లక్ష రూపాయల వరకు దోచుకున్నాడు. అంతే కాకుండా తాను చెప్పిన వ్యక్తినే పెళ్లి చేసుకోవాలంటూ బలవంతం చేయసాగాడు. ఇక వాడి టార్చర్‌ భరించలేక ఆ యువతి పోలీసులను ఆశ్రయించింది. వివరాల్లోకి వెళితే సంభాల్‌(sambal) జిల్లాలోని హయత్‌నగర్‌(Hayatt nagar) పోలీస్‌స్టేషన్‌ పరిధిలోని ఓ గ్రామంలో 19 ఏళ్ల యవతి కొంతకాలంగా అనారోగ్యంతో బాధపడుతోంది. ఈ క్రమంలో తనకు తెలిసిన ఓ తాంత్రికుడు ఉన్నాడని, అతడు ఆరోగ్య సమస్యలు తీరుస్తాడని యువతి బంధువు ఒకరు చెప్పారు. దాంతో ఆ యువతి అమాయకంగా తాంత్రికుడి దగ్గరకు వెళ్లింది, నిరుడు జూన్‌లో ఆ తాంత్రికుడు ఆ యువతికి మత్తు మందు ఇచ్చి అత్యాచారం చేశాడు. దాన్ని వీడియో తీశాడు. ఆ వీడియోను సోషల్‌ మీడియాలో వైరల్‌ చేస్తానంటూ బెదిరిస్తూ పలుసార్లు రేప్‌ చేశాడు. పైగా ఆ యువతి నుంచి లక్ష రూపాయల వరకు లాక్కున్నాడు. అంతే కాకుండా రాజున్హాకు చెందిన యువకుడిని పెళ్లి చేసుకోవాలని ఆ యువతిపై ఒత్తిడి తెచ్చాడు.

అందుకు ఆమె ఒప్పుకోకపోవడంతో సహచరులతో కలిసి ఆమెను బెదిరించాడు. దీంతో బాధితురాలు పోలీసులకు జరిగిన విషయాన్ని చెప్పింది. బాధితురాలి ఫిర్యాదు మేరకు తాంత్రికుడు పుష్పేంద్రతో పాటు అతని సహచరులపై కేసు నమోదు చేసి దర్యాప్తు మొదలుపెట్టారు పోలీసులు.