Leopard in Malegaon : ఈ పిల్లోడు చిరుత కంటే చురుకైనవాడు !

పులో(Tiger), చిరుతనో ఎదురుపడితే ఏం చేస్తాం? గజగజమని వణికిపోతాం! కంగారుపడి దాన్ని కంగారుపెడతాం. కానీ ఓ పన్నెండేళ్ల పిల్లోడు మాత్రం ఏమాత్రం తోటుపాటు పడలేదు. చిరుత కంటే చురుకుగా వ్యవహరించాడు. అది కూడా చాలా కూల్‌గా! ఇది చెబితే ఎవరూ నమ్మరు కానీ సీసీ టీవీలో రికార్డయ్యింది కాబట్టి నమ్మి తీరాలి. పైగా ఈ దృశ్యాలు ఇప్పుడు సోషల్‌ మీడియాలో(Social) వైరల్‌ అవుతున్నాయి. నాసిక్‌లో(Nasik) మాలేగావ్‌లో(Malegaon) ఈ ఘటన చోటు చేసుకుంది. మోహిత్‌ అహిరే అనే పన్నెండేళ్ల పిల్లోడు ఓ మ్యారేజ్‌ హాల్‌ క్యాబిన్‌ డోర్‌ దగ్గర ఉన్న సోఫాలో కూర్చుని స్మార్ట్‌ఫోన్‌లో గేమ్స్‌ ఆడుకుంటున్నాడు. ఇంతలో అడుగులో అడుగు వేసుకుంటూ ఓ చిరుత ఇంట్లోకి దూరింది. మోహిత్‌కు దగ్గర్నుంచే అది వెళ్లింది. వేరే వాళ్లయితే అరచి కేకలు పెట్టి నానా గందరగోళం చేసేవారు. కానీ మోహిత్‌ మాత్రం నెమ్మదిగా అక్కడ్నుంచి లేచి చప్పుడు చేయకుండా బయటకు వచ్చేసి తలుపు గడియ పెట్టేశాడు. ఆ బుడ్డోడు రియాక్ట్‌ అయిన తీరును నెటిజన్లు మెచ్చుకుంటున్నారు. మోహిత్‌ తండ్రి ఓ మ్యారేజ్‌ హాల్‌లో సెక్యూరిటీ గార్డుగా పని చేస్తున్నాడు. మంగళవారం ఉదయం ఏడు గంటల ప్రాంతంలో ఈ ఘటన చోటు చేసుకుంది. అటవీశాఖ అధికారులు వచ్చేంతవరకు ఆఫీసు క్యాబిన్‌లోనే దానిని బంధించి ఉంచారు.