Kerala High Court : కేరళ హైకోర్టు వినూత్నతీర్పు

కేరళ హైకోర్టు వినూత్నతీర్పు
ఇద్దరు జీవిత ఖైదీలకు లా కోర్సు చేసేందుకు అనుమతి
లా కోర్సు ఎంట్రెన్స్‌లో ఉత్తీర్ణులైన ఖైదీలు
ఆన్‌లైన్ తరగతులకు అనుమతించిన కేరళ హైకోర్టు

పాన్‌ ఇండియా డైరెక్టర్‌ రాజమౌళి(Rajamouli) ఇది జరుగుతుందని ముందే ఊహించాడా..? సమాజంలో చోటు చేసుకున్న అంశాలపై సినిమాలు తీయడం చూశాం. కానీ రాజమౌళి మాత్రం రానున్న కొన్నేళ్లలో ఇలా జరుగుతుందని ముందే ఊహించినట్టున్నాడు. రాజమౌళి తొలి సినిమా స్టూడెంట్ నెంబర్- 1(Student no1) అని మనకు తెలిసిందే. ఈ సినిమాలో హత్య కేసులో అరెస్టయిన హీరో జూ.ఎన్టీఆర్‌(Jr. NTR) జైలు నుంచే లా చదివి లాయర్ అవుతాడు. స్టూడెంట్‌ నెంబర్‌- 1ను సినిమాలాంటి ఘటనే తాజాగా కేరళ(Kerala)లో చోటుచేసుకుంది. హత్య కేసులో దోషులుగా ఉన్న ఇద్దరు జీవిత ఖైదీలకు లా చదవడానికి కేరళ హైకోర్టు(Kerala High Court) అనుమతించింది. జైలు నుంచి ఆన్‌లైన్‌లో తరగతులకు హాజరయ్యేందుకు జస్టిస్ ఏకే జయశంకరన్ నంబియార్(A. K. Jayasankaran Nambiar), జస్టిస్ కౌసర్ ఎడప్పగత్‌(Kauser Edappagath)ల ధర్మాసనం అంగీకరించింది.

ఈ సందర్భంగా ధర్మాసనం తీర్పునిస్తూ ఖైదీలకు ఉండే హక్కులపై వ్యాఖ్యానించింది. ఖైదీలకు ప్రాథమిక మానవ హక్కులు ఉంటాయి. జైలులో గౌరవంగా జీవించే హక్కు ఖైదీలకు ఉంది. ఖైదీలకు విద్యాహక్కు కూడా ప్రాథమిక హక్కు కిందికే వస్తుంది. ఖైదీలకు చదువును కొనసాగించే హక్కు కూడా అంతే ఉంది. ఖైదీలలో తాము విస్తృత సమాజంలో ఒక భాగంగా ఉండాలనే భావనకు విద్య దోహదపడుతుంది. జైలు నుంచి విడుదలైన తర్వాత మెరుగైన జీవితాలను గడపడానికి కూడా ఇది సహాయపడుతుంది. అందువల్ల, ఖైదీలకు విద్య అందుబాటులో ఉండేలా చూసుకోవడం జైలు శిక్ష యొక్క సంస్కరణాత్మక మరియు పునరావాస లక్ష్యాలను సాధించడానికి చాలా అవసరం, ”అని బెంచ్ పేర్కొంది.

ఉన్నత చదువులు చదివేందుకు వీలుగా, తమ శిక్ష అమలును నిలిపివేసి, బెయిల్‌పై విడుదల చేయాలని కోరుతూ ఇద్దరు జీవిత ఖైదీల అభ్యర్ధనలను ఈ కేసులో కోర్టు విచారించింది. దరఖాస్తుదారులు ఎల్‌ఎల్‌బీ చదివేందుకు ప్రవేశ పరీక్షలో ఉత్తీర్ణులయ్యారు. ఆన్‌లైన్ మోడ్‌లో కోర్సుకు అడ్మిషన్ ప్రక్రియను పూర్తి చేయాలని సంబంధిత కళాశాల అధికారులను కోర్టు గతంలో ఆదేశించింది. దరఖాస్తుదారుల భార్య, సోదరుడు అవసరమైన పత్రాలతో కళాశాలకు హాజరై ఫీజు చెల్లించాలని ఆదేశించింది. దరఖాస్తుదారులు తమ శిక్ష అమలును నిలిపివేయాలని కోరిన నేపథ్యంలో అడ్మిషన్ ప్రక్రియ పూర్తయిందని, నవంబర్ 6న తరగతులు ప్రారంభం కానున్నాయని కోర్టుకు సమాచారం ఇచ్చారు.
అయితే కోర్టు ఆదేశిస్తే దరఖాస్తుదారులను ఆన్‌లైన్ తరగతులకు అనుమతించవచ్చని సంబంధిత కళాశాలల ప్రిన్సిపాళ్లు చెప్పారు.
దోషులను సంస్కరించడానికి మరియు పునరావాసం కల్పించడానికి విద్య సహాయపడుతుందని కోర్టు భావించినప్పటికీ, శిక్ష అమలును నిలిపివేయడానికి, కోర్సుకు హాజరు కావడానికి దరఖాస్తుదారులకు బెయిల్ మంజూరు చేయడానికి నిరాకరించింది.

శిక్ష అమలును నిలిపివేయకుండా, దరఖాస్తుదారులు ఆన్‌లైన్‌లో అందుబాటులో ఉన్న సాంకేతిక పరిజ్ఞానాన్ని ఉపయోగించి తరగతులకు అనుమతించబడతారని మేము భావిస్తున్నాం. ప్రస్తుతం ఉన్నటువంటి అసాధారణమైన సందర్భాల్లో కోర్సు కోసం ఆన్‌లైన్ తరగతులకు హాజరు కావడానికి ఖైదీలను అనుమతించడం.. 2020 నిబంధనలను ఉల్లంఘించదని కోర్టు పేర్కొంది. కేరళలోని జైళ్లలో వీడియో కాన్ఫరెన్స్ సౌకర్యం ఉంది. ఇంకా, దరఖాస్తుదారులు ఆన్‌లైన్‌లో తరగతులకు హాజరయ్యేలా అవసరమైన ఏర్పాట్లు చేసేందుకు రెండు కళాశాలల ప్రిన్సిపాళ్లు తమ సుముఖత వ్యక్తం చేశారు.