Rain Alert : 26 రాష్ట్రాల‌కు భారీ వ‌ర్ష హెచ్చరిక
రుతుపవనాలు షెడ్యూల్ సమయానికి ఆరు రోజుల ముందు అంటే జూలై 2న దేశం మొత్తాన్ని కవర్ చేశాయి
రుతుపవనాలు షెడ్యూల్ సమయానికి ఆరు రోజుల ముందు అంటే జూలై 2న దేశం మొత్తాన్ని కవర్ చేశాయి. దీంతో దేశంలోని చాలా రాష్ట్రాల్లో వర్షాలు కురుస్తున్నాయి. ఈశాన్య ప్రాంతంలో పరిస్థితి దారుణంగా ఉంది. అసోం, మణిపూర్‌లో వర్షాల కారణంగా వరదలు వచ్చాయి. మణిపూర్‌లో పాఠశాలలు, కళాశాలలు గురువారం వరకు మూసివేయబడ్డాయి. నాగాలాండ్‌లో గత కొన్ని రోజులుగా కురుస్తున్న వర్షాలకు సుమారు ఐదుగురు మరణించారు.
పంజాబ్, హర్యానా, చండీగఢ్, ఢిల్లీ, ఉత్తరాఖండ్, రాజస్థాన్, గుజరాత్, బీహార్, పశ్చిమ బెంగాల్, సిక్కిం, అరుణాచల్ ప్రదేశ్, మణిపూర్, మేఘాలయ, అస్సాం, నాగాలాండ్, త్రిపుర, మిజోరాం తదితర 9 రాష్ట్రాల్లో భారీ వర్షాలు కురుస్తాయని వాతావరణ శాఖ హెచ్చరించింది. హిమాచల్ ప్రదేశ్, ఉత్తరప్రదేశ్, మధ్యప్రదేశ్, ఛత్తీస్‌గఢ్, మహారాష్ట్ర, గోవా, ఆంధ్రప్రదేశ్, కర్ణాటక, కేరళ రాష్ట్రాల‌కు భారీ వర్షాల హెచ్చరిక జారీ చేసింది.
రానున్న 24 గంటల్లో ఉత్తరప్రదేశ్, పంజాబ్, హర్యానా, ఉత్తరాఖండ్ రాష్ట్రాల్లో మోస్తరు నుంచి భారీ వర్షాలు కురిసే అవకాశం ఉందని వాతావరణ అంచనా సంస్థ స్కైమెట్ తెలిపింది. ఈశాన్య భారతదేశం, బీహార్, జార్ఖండ్, ఢిల్లీ, తూర్పు గుజరాత్, కోస్టల్ కర్ణాటక, కొంకణ్, గోవా, మధ్యప్రదేశ్, ఛత్తీస్‌గఢ్, అండమాన్ మరియు నికోబార్ దీవులలో తేలికపాటి నుండి మోస్తరు వర్షాలు కురుస్తాయని వెల్ల‌డించింది. పశ్చిమ బెంగాల్, తూర్పు రాజస్థాన్, విదర్భ, ఒడిశా, కేరళ, హిమాచల్ ప్రదేశ్, సౌరాష్ట్ర, కచ్ మరియు లక్షద్వీప్‌లలో తేలికపాటి నుండి మోస్తరు వర్షాలు కురుస్తాయని పేర్కొంది. జమ్మూ కాశ్మీర్, లడఖ్, రాయలసీమ, సెంట్రల్ మహారాష్ట్ర, మరఠ్వాడా, తమిళనాడులో తేలికపాటి వర్షాలు కురిసే అవకాశం ఉందని వెల్ల‌డించింది.
వాతావరణ శాఖ ప్రకారం.. రాబోయే నాలుగు రోజుల్లో దేశంలోని వాయువ్య, మధ్య ప్రాంతాల్లో మెరుపులు, ఉరుములతో కూడిన తేలికపాటి నుండి మోస్తరు వర్షాలు కురిసే అవకాశం ఉంది. జూలై 3, 4 తేదీల్లో పశ్చిమ ఉత్తరప్రదేశ్‌లోని కొన్ని చోట్ల భారీ నుంచి అతి భారీ వర్షాలు కురిసే అవకాశం ఉంది. రానున్న మూడు రోజుల్లో ఉత్తరాఖండ్‌లోని కొన్ని ప్రాంతాలలో భారీ నుండి అతి భారీ వర్షాలు కురిసే అవకాశం ఉంది. జూలై 4 నుండి 6 వరకు నాగాలాండ్, మణిపూర్, త్రిపుర, అస్సాం, మేఘాలయలో భారీ నుండి అతి భారీ వర్షాలు కురిసే అవకాశం ఉంది. జూలై 5 నుండి 7 వరకు మధ్య మహారాష్ట్రలోని కొన్ని ప్రాంతాలలో భారీ నుండి అతి భారీ వర్షాలు కురిసే అవకాశం ఉంది.
IMD ప్రకారం.. దేశవ్యాప్తంగా రుతుపవనాల వర్షాలకు అనుకూలమైన పరిస్థితులు సృష్టించబడ్డాయి. దీని కారణంగా రానున్న నాలుగు రోజుల పాటు జమ్మూ కాశ్మీర్, లడఖ్, హిమాచల్ ప్రదేశ్, హర్యానా, పంజాబ్, చండీగఢ్, రాజస్థాన్, ఛత్తీస్‌గఢ్, ఒడిశా, తూర్పున జార్ఖండ్, కేరళ, కర్ణాటక, తమిళనాడు, తెలంగాణ, ఆంధ్రప్రదేశ్ తీరప్రాంతాల్లో, గోవా, మహారాష్ట్ర, గుజరాత్‌లోని వివిధ ప్రాంతాల్లో తేలికపాటి నుండి మోస్తరు వర్షాలు కురుస్తాయని సెంట్రల్ ఎల్లో అలర్ట్ జారీ చేసింది.
