EVM Hacking : ఈవీఎంలు హ్యాకింగ్‌ అయ్యే అవకాశం: అమెరికా ఇంటెలిజెన్స్‌ చీఫ్‌ తులసీ గబ్బార్డ్..!

భారత్‌లో ఈవీఎంల పనితీరుపై చాలా సార్లు వివాదాలు తలెత్తాయి. ఈవీఎంలు 1980లలో మొదటిసారి ప్రవేశపెట్టినప్పటి నుంచి, ముఖ్యంగా 2000ల తర్వాత విస్తృతంగా వాడినప్పుడు, వాటిపై అనుమానాలు, ఆరోపణలు వస్తూనే ఉన్నాయి. చాలా మంది రాజకీయ నాయకులు, కార్యకర్తలు ఈవీఎంలను హ్యాక్ చేయొచ్చని, ఓట్లను మార్చొచ్చని ఆరోపించారు. 2019 ఎన్నికల తర్వాత, కొన్ని పార్టీలు ఈవీఎంల వల్లే తాము ఓడిపోయామని క్లెయిమ్ చేశాయి. సైయద్ షుజా (Syed Shuja)అనే వ్యక్తి 2019లో ఈవీఎం(EVM)లను హ్యాక్ చేయొచ్చని చెప్పి సంచలనం సృష్టించాడు, కానీ అతని వాదనలకు ఆధారాలు లేవని ఎన్నికల సంఘం చెప్పింది. కొన్ని సందర్భాల్లో, ఈవీఎంలలో టెక్నికల్ గ్లిచ్‌లు బటన్ ఒక పార్టీకి నొక్కినా వేరే పార్టీకి ఓటు వెళ్లడం రిపోర్ట్ అయ్యాయి. 2017 యూపీ (UP)ఎన్నికల్లో ఇలాంటి ఆరోపణలు వచ్చాయి. అయితే, ఎన్నికల సంఘం ఇవి చాలా అరుదైన సాంకేతిక లోపాలని, హ్యాకింగ్ కాదని వాదించింది. వోటర్ వెరిఫైడ్ పేపర్ ఆడిట్ ట్రయల్ (VVPAT) 2014 నుంచి పూర్తిగా అమల్లోకి వచ్చింది. దీనితో ఓటరు తన ఓటు సరిగ్గా రికార్డ్ అయిందో లేదో చూసుకోవచ్చు. కానీ, VVPAT స్లిప్‌లను ఈవీఎంలతో 100% సరిపోల్చాలని కొందరు డిమాండ్ చేశారు. ప్రస్తుతం ఒక అసెంబ్లీ నియోజకవర్గంలో 5 రాండమ్ VVPATలను మాత్రమే సరిపోలుస్తుంది. ఈవీఎంలపై అనుమానాలు తరచూ రాజకీయ రంగు పులుముకుంటాయి. ఓడిపోయిన పార్టీలు ఈవీఎంలను నిందించడం, గెలిచినవాటు వాటిని సమర్థించడం సర్వసాధారణం.

ఈ నేపథ్యంలోనే అమెరికా ఇంటెలిజెన్స్‌ చీఫ్‌ తులసీ గబ్బార్డ్ సంచలన వ్యాఖ్యలు చేశారు. ఆమె అమెరికా డైరెక్టర్ ఆఫ్ నేషనల్ ఇంటెలిజెన్స్‌గా ఫిబ్రవరి 2025లో బాధ్యతలు స్వీకరించింది. ఓ క్యాబినెట్ మీటింగ్‌లో ఎలక్ట్రానిక్ వోటింగ్ సిస్టమ్స్ (EVS) హ్యాకింగ్‌కు గురయ్యే అవకాశం ఉందని, దీనికి ఇంటెలిజెన్స్ విభాగం వద్ద "సాక్ష్యం" ఉందని చెప్పింది. కానీ భారత్‌లో ఈవీఎంల పనితీరుపై చెప్పలేదనేది కొందరు వాదిస్తున్నారు. కొన్ని ఎలక్ట్రానిక్ వోటింగ్ మెషీన్లు ఇంటర్నెట్‌కు కనెక్ట్ అయ్యే అవకాశం ఉందని, దీనివల్ల హ్యాకింగ్ రిస్క్ ఉండవచ్చని కొంతమంది నిపుణులు గతంలో చెప్పారు. భారత్‌లోని ఈవీఎంల విషయానికొస్తే, ఎన్నికల సంఘం ఈవీఎంలు పూర్తిగా స్టాండ్‌లోన్ మెషీన్లని, ఇంటర్నెట్ లేదా ఇతర నెట్‌వర్క్‌లకు కనెక్ట్ కావని, అందువల్ల హ్యాకింగ్ అసాధ్యమని స్పష్టం చేసింది.