Abhishek Banerjee : సీఎం మేన‌ల్లుడి కంపెనీపై ఈడీ దాడులు

టీఎంసీ ఎంపీ(TNC MP) అభిషేక్ బెనర్జీ(Abhishek Banerjee) కష్టాలు తగ్గుముఖం పట్టడం లేదు. టీఎంసీ ఎంపీ, పశ్చిమ బెంగాల్(West Bengal) ముఖ్యమంత్రి మమతా బెనర్జీ(Mamata Banerjee) మేనల్లుడు అభిషేక్ బెనర్జీ సీఈఓగా ఉన్న కోల్‌కతాలోని ఒక కంపెనీకి చెందిన పలు కార్యాల‌యాలపై దాడులు చేసి అనేక‌ పత్రాలను స్వాధీనం చేసుకున్నట్లు ఎన్‌ఫోర్స్‌మెంట్ డైరెక్టరేట్(Enforcement Directorate) బుధవారం తెలిపింది. లీప్స్ అండ్ బౌండ్స్ ప్రైవేట్ లిమిటెడ్ కంపెనీకి చెందిన మూడు కార్యాల‌యాల్లో ఆగస్టు 21-22 తేదీల్లో సోదాలు జరిగాయి.

ఈ కేసులో అరెస్టయిన నిందితుడు, కంపెనీ చీఫ్ ఆపరేటింగ్ ఆఫీసర్ (సిఓఓ) సుజయ్ కృష్ణ భద్రపై(Sujay Krishna Bhadra) చర్యలు తీసుకున్నట్లు ఎన్‌ఫోర్స్‌మెంట్ డైరెక్టరేట్ ఒక ప్రకటనలో తెలిపింది. ఈ కంపెనీ కోట్లాది రూపాయల మొండి బకాయిల లావాదేవీలు జరిపినట్లు ఆరోపణలు వచ్చాయి. ఈ కంపెనీలో సుజయ్ కృష్ణ భద్ర ఏప్రిల్ 2012 నుంచి మార్చి 2016 వరకు డైరెక్టర్‌గా ఉన్నారని ఈడీ తెలిపింది. అభిషేక్ బెనర్జీ చీఫ్ ఎగ్జిక్యూటివ్ ఆఫీసర్ (CEO)గా ఉన్నారు.

సెర్చ్ ఆపరేషన్‌లో వివిధ నేరారోపణ పత్రాలు, డిజిటల్ సాక్ష్యాలను స్వాధీనం చేసుకున్నట్లు ఈడీ తెలిపింది. అయితే.. అభిషేక్ బెనర్జీ స్పందిస్తూ.. ఎప్పుడూ ఎలాంటి తప్పు చేయలేదని ఖండించారు. రాజకీయ పగతో ప్రేరేపించబడిన చర్యగా పిలిచారు.

ఈ విచారణలో భాగంగా మే నెలలో సుజయ్ కృష్ణ భద్రను ఈడీ అరెస్ట్ చేసింది. పశ్చిమ బెంగాల్ మాజీ విద్యా మంత్రి పార్థ ఛటర్జీ, అతని సహాయకురాలు అర్పితా ముఖర్జీ, TMC ఎమ్మెల్యే, పశ్చిమ బెంగాల్ ప్రాథమిక విద్యా బోర్డ్ మాజీ ఛైర్మన్ మాణిక్ భట్టాచార్య, TMC యువజన విభాగం నాయకులు కుంతల్ ఘోష్, శంతను బెనర్జీ, అయాన్ సిల్‌లను కూడా అరెస్టు చేసింది.

మనీలాండరింగ్ నిరోధక చట్టం (పీఎంఎల్‌ఏ) నిబంధనల ప్రకారం.. మొత్తం ఐదు ఛార్జిషీట్‌లు దాఖలయ్యాయి. ఈడీ అరెస్టు చేసిన తర్వాత పార్థ ఛటర్జీని టీఎంసీ సస్పెండ్ చేసింది. ఈ కేసులో ఇప్పటివరకు రూ.126 కోట్లకు పైగా ఆస్తులను అటాచ్ చేశారు.