Chaugan Village : ఆ గ్రామంలో అందరూ ఒకే రంగు బట్టలు వేసుకోవాల్సిదే..!

భారతదేశంలో విభిన్న రకాల సంప్రదాయాలు చూస్తుంటాం. వేలాది మంది తెగలు, విభిన్న జాతుల ప్రజలు నివసిస్తుంటారు. ఒక్కో తెగలో, ఒక్కో జాతిలో భిన్న సాంప్రదాయాలు ఉంటాయి. విభిన్న సంస్కృతుల సమ్మేళనం మన భారత దేశం. అయితే ఈ కోవలోకి ఓ గ్రామం వస్తుంది. మధ్యప్రదేశ్‌లోని(Madhya Pradesh) మాండ్లా జిల్లా కేంద్రానికి 25 కి.మీ. దూరంలో రామ్‌నగర్‌ సమీపంలో ఈ చౌగాన్ గ్రామం(Chaugan Village) ఉంటుంది

ఈ గ్రామంలో ఓ విచిత్రమైన సంప్రదాయముంది. ప్రజలంతా ఏడాది ఒకే రంగు దుస్తులు ధరించాలి. గ్రామంలో నివసించే ప్రతి మహిళ, పురుషుడు తెల్ల రంగు దుస్తులు(White Colour) ధరించాలన్న షరతు ఉంది. ఊరి జనాభా దాదాపు వెయ్యికి పేనే ఉంటుంది. ఈ గ్రామంలోని ప్రజలంతా ఎల్లప్పుడు తెల్ల దుస్తులే ధరించాలి. ఈ గ్రామ ప్రజలు ఇతర గ్రామాలకు వెళ్లినా, ఇతర గ్రామాల్లోని శుభకార్యాలకు వెళ్లినా వేషధారణ మాత్రం తెల్ల రంగులోనే ఉండాలి. వారి పూర్వీకుల నుంచి ఇదే సాంప్రదాయాన్ని కొనసాగిస్తున్నారని.. మేం కూడా ఈ సాంప్రదాయాన్ని ముందుకు తీసుకెళ్తున్నామని స్థానికులు చెప్తున్నారు. చివరికి పెళ్లి పీటల మీద కూడా పెళ్లి కొడుకు, పెళ్లి కూతురు తెల్లని దుస్తులే ధరించాలి. దీనికి చదువుకున్నవారు కూడా అతీతం కాదు. ఎట్టి పరిస్థితుల్లో తెల్ల బట్టలు ధరించాలని నిబంధన ఉంది. అంతేకాకుండా ఈ గ్రామంలో ఉన్న ఆలయంలో గిరిజనులు ప్రత్యేక పూజలు చేస్తారు. ఈ ఊరిలో స్వర్గ మెట్లుగా పిలిచే పురాతన మెట్లు ఉన్నాయి. వీటిని చూసేందుకు టూరిస్టులు వస్తుంటారు. పక్క రాష్ట్రాల నుంచే కాకుండా ఇతర రాష్ట్రాల నుంచి కూడా ఈ స్వర్గ మెట్లను సందర్శించి తమ కోరికలు విన్నవించుకుంటారు.