Sonia Gandhi Karnataka : కర్ణాటక 'సార్వభౌమాధికారం' వ్యాఖ్య‌లు.. సోనియాపై ఈసీకి ఫిర్యాదు చేసిన బీజేపీ

కర్ణాటక ప్రతిష్టకు, సార్వభౌమత్వానికి, సమగ్రతకు ముప్పు వాటిల్లేలా ఎవరినీ అనుమతించబోమని కాంగ్రెస్ మాజీ అధ్యక్షురాలు సోనియా గాంధీ చేసిన ప్రకటనపై భారతీయ జనతా పార్టీ (బిజెపి) సోమవారం ఎన్నికల కమిషన్‌కు ఫిర్యాదు చేసింది. ఈ విష‌య‌మై ఎన్నికల సంఘాన్ని కలిసి ఫిర్యాదు చేసేందుకు బీజేపీ ప్రతినిధి బృందం వెళ్లింది. శనివారం హుబ్లీలో జరిగిన ఎన్నికల ర్యాలీలో సోనియా గాంధీ ప్రసంగిస్తూ ఈ వ్యాఖ్య‌లు చేశారు.

సోనియా చేసిన ఈ ప్రకటనపై బీజేపీ ఎన్నికల సంఘాన్ని ఆశ్రయించింది. ఈ విష‌య‌మై ఫిర్యాదు చేసిన కేంద్ర మంత్రి శోభా కరంద్లాజే మాట్లాడుతూ.. ఈ ప్రకటన దిగ్భ్రాంతికరమైనది. ఆమోదయోగ్యం కాదు. మోడల్ కోడ్ ఆఫ్ కండక్ట్ నిబంధనలను సోనియా ఉల్లంఘించారని అన్నారు. సోనియా గాంధీపై కఠిన చర్యలు తీసుకోవాలని కోరారు. సోనియా గాంధీపై ఎఫ్‌ఐఆర్ నమోదు చేసి చర్యలు తీసుకునేలా ఎన్నికల కమిషన్ ఆదేశాలు జారీ చేయాలని బీజేపీ ఎన్నికల నిర్వహణ కమిటీ కన్వీనర్ కరంద్లాజే కోరారు.

మరోవైపు సోనియా గాంధీ కావాలనే సార్వభౌమాధికారం అనే పదాన్ని ఉపయోగించారని కేంద్ర మంత్రి భూపేంద్ర యాదవ్ అన్నారు. కాంగ్రెస్ మేనిఫెస్టో తుక్డే-తుక్డే గ్యాంగ్ ఎజెండా అని, అందుకే అలాంటి పదాలను కూడా వాడుతున్నారని అన్నారు. ఇలాంటి దేశ వ్యతిరేకులపై ఎన్నికల సంఘం చర్యలు తీసుకుంటుంది. ప్రధాని నరేంద్ర మోదీ ర్యాలీలో సైతం.. ఆదివారం సోనియాగాంధీ చేసిన ప్రకటనపై కర్ణాటకను భారతదేశం నుండి విడదీయడాన్ని కాంగ్రెస్ బహిరంగంగా సమర్థిస్తోందని ఆరోపించారు. హుబ్లీలో సోనియా ఎన్నికల ర్యాలీ అనంతరం ప్రధాని ఈ ఆరోపణ చేశారు.

కర్ణాటకలోని బీజేపీ ప్రభుత్వానికి వ్యతిరేకంగా కాంగ్రెస్‌ 'రేట్ కార్డ్' ప్రకటనపై ఎన్నికల సంఘం నోటీసు జారీ చేసింది. ఎన్నికల సంఘం పక్షపాతంతో వ్యవహరిస్తోందని కాంగ్రెస్ ఆరోపించింది. ప్రతిస్పందనకు మరింత సమయం కోరింది. పార్టీ నాయకుడు, న్యాయవాది అభిషేక్ మను సింఘ్వీ.. కమిషన్ ఇచ్చిన నోటీసుకు తన 'ప్రాధమిక సమాధానం'లో కర్ణాటక అసెంబ్లీ ఎన్నికల ప్రచారం కొనసాగుతున్నందున సమాధానం ఇవ్వడానికి కమిషన్ ఇచ్చిన 24 గంటల సమయం సరిపోదని అన్నారు. ఎన్నికల సంఘం ఎన్నికల ప్రవర్తనా నియమావళిని పదే పదే, బహిరంగంగా ఉల్లంఘించినా.. ఈసీ ప్రధాని మోడీ, మరికొందరు సీనియర్ బిజెపి నాయకులకు నోటీసులు జారీ చేయలేదు. ఖండన కూడా చేయలేదని కాంగ్రెస్ చెబుతోంది.