Delhi Fire Accident : ఢిల్లీలో అగ్ని ప్రమాదం, 11 మంది సజీవదహనం

దేశ రాజధాని ఢిల్లీలో (delhi)ఘోర అగ్ని ప్రమాదం( fire accident) చోటు చేసుకుంది. అలీపూర్‌లో (alipur)ఓ పెయింట్‌ ఫ్యాక్టరీలో (paint factory)సంభవించిన పేలుడుతో మంటలు చెలరేగాయి. ఆ అగ్నికి పదకొండు మంది ఆహుతి అయ్యారు. మంటలు అదుపులోకి వచ్చినప్పటికీ మరి కొందరి ఆచూకీ దొరకలేదు. దాంతో మృతుల సంఖ్య పెరగవచ్చని అధికారులు ఆందోళన చెందుతున్నారు. అలీపూర్‌ దయల్‌పూర్‌ మార్కెట్‌లో గురువారం సాయంత్రం ఓ పెయింట్‌ ఫ్యాక్టరీలో మంటలు చెలరేగాయి. అవి చుట్టుపక్కల ఇళ్లకు, దుకాణాలకు కూడా వేగంగా వ్యాపించాయి. సమాచారం అందుకున్న అగ్నిమాపక సిబ్బంది ఘటనాస్థలానికి చేరుకున్నారు. గాయపడిన వాళ్లను ఆస్పత్రికి తరలించారు. సాయంత్రం అయిదు గంటల ప్రాంతంలో తమకు సమాచారం అందిందని, రాత్రి 9 గంటల వరకు మంటలను అదుపులోకి తీసుకొచ్చామని ఢిల్లీ ఫైర్‌ సర్వీసు అధికారి తెలిపారు. మంటలను 22 ఫైరింజన్ల సాయంతో అతి కష్టం మీద అదుపులోకి తెచ్చామన్నారు.

ఫ్యాక్టరీలోని రసాయనాల వల్లే పేలుడు సంభవించి ఉండొచ్చని పోలీసులు భావిస్తున్నారు.