Trisha Krishnan : త్రిష అందానికి డైరెక్టర్లు ఫిదా.. ఆఫర్లే ఆఫర్లు.!

త్రిష(Trisha) అందం చెక్కుచెదరడం లేదు. వర్షం(Varsham) సినిమాలో ఎంత అందంగా ఉందో నాలుగు పదుల వయసులోనూ అంతే అందంగా ఉంది. ఇంకా రెట్టింపు అయ్యిందంటే అతిశయోక్తి కాదు. ఆమె ఇప్పటికీ స్టార్‌ హీరోయినే! సినీ కెరీర్‌లో ఆమె అనేక ఉత్థాన పతనాలను చూశారు. ఫ్లాప్స్‌ వెంటాడుతున్న సమయంలో ఓ పెద్ద సూపర్‌హిట్‌ సినిమా వచ్చి ఆమెలో కొత్త ఉత్సాహాన్ని నింపేది. ఇప్పటికీ ఆ సంప్రదాయం కొనసాగుతూనే ఉంది. ఒకప్పుడు విన్నైతాండి వరువాయా సినిమా త్రిష కెరీర్‌కు టర్నింగ్‌ పాయింట్‌ అయ్యింది.

ఆ తర్వాత కొన్ని సినిమాలు అంతగా విజయవంతం కాలేదు. త్రిష పని అయిపోయిందని అనుకున్నారంతా! కానీ 96 చిత్రం ఆమెకు మళ్లీ స్టార్‌ హోదాను కట్టబెట్టింది. ఇప్పుడు పొన్నియన్‌ సెల్వన్‌(Ponniyin Selvan) సినిమా త్రిషకు నటిగా పునర్జన్మను ఇచ్చింది. పొన్నియన్‌ సెల్వన్‌లో త్రిషచూపుతిప్పుకోలేనంత అందంగా ఉంది. ఈ సినిమాతో త్రిష మళ్లీ తీరిక లేకుండా అయ్యారు. వరుస ఆఫర్లు ఆమెకు వస్తున్నాయి.

ప్రస్తుతం త్రిష ది రోడ్‌(Road) అనే లేడీ ఓరియంటెడ్‌ సినిమాలో నటిస్తున్నారు. దీంతో పాటు హీరో విజయ్‌(Vijay) సరసన లియో(LEO) సినిమాలో నటిస్తున్నారు. అజిత్‌(ajith) కొత్త చిత్రం విడా ముయర్చిలోనూ, మణిరత్నం(Mani Ratnam) దర్శకత్వంలో కమలహాసన్‌(Kamal Hassan) నటిస్తున్న 234 చిత్రంలోనూ త్రిషనే హీరోయిన్! ఇవి కాకుండా ఇంకో లేడీ ఓరియంటెడ్‌ కథా చిత్రంలో కూడా నటించడానికి త్రిష ఓకే చెప్పారు. ఈ సినిమాను వేల్స్‌ ఫిలిం ఇంటర్నేషనల్‌ పతాకంపై ఐసరి గణేశ్‌(Isari Ganesh) నిర్మించనున్నారు. ఈ సినిమాకు గౌరవ్‌ నారాయణన్‌(Gourav Narayan) దర్శకత్వం వహిస్తున్నారు. ఇందులో ముగ్గురు ప్రముఖ నటులు అతిథి పాత్రలలో కనిపించనున్నారు. వారు ఎవరన్నది త్వరలో చిత్ర యూనిట్‌ వెల్లడిస్తుంది.