Kushi Kapoor : కోలీవుడ్‌లో అడుగుపెడుతున్న ఖుషీ కపూర్‌

అతిలోక సుందరి శ్రీదేవి(Sridevi) చిన్న కూతురు ఖుషీ కపూర్‌కు(Kushi Kapoor) తమిళ సినీ రంగం నుంచి పిలుపు వచ్చింది. తమిళ నటుడు అథర్వ(Atharva) కథానాయకుడిగా నటిస్తున్న ఓ తమిళ సినిమాలో హీరోయిన్‌ పాత్రకు ఖుషీ కపూర్‌ను సంప్రదించారట. ఈ సినిమాను ఆకాశ్‌(Aakash) అనే కొత్త దర్శకుడు రూపొందిస్తున్నారు. ఖుషీ కపూర్‌కు ఈ సినిమా కథ ఎంతగానో నచ్చిందట! ఆమె దాదాపు గ్రీన్‌ సిగ్నల్ ఇచ్చారన్న మాట తమిళ ఇండస్ట్రీలో వినిపిస్తోంది. ఒకవేళ అదే నిజమైతే మాత్రం ఖుషీ కపూర్‌ నటించే మొదటి తమిళ సినిమా ఇదే అవుతుంది. ఇంతకు ముందు కూడా ఖుషీ కపూర్‌ తమిళంలో నటిస్తారనే వార్తలు వచ్చాయి. పయ్యా సినిమాకు సీక్వెల్‌గా పయ్యా 2 సినిమా రానుందని, ఇందులో ఆర్య హీరోగా నటిస్తారని, ఖుషీ కపూర్‌ హీరోయిన్‌గా ఎంపికయ్యారని టాక్ వినిపించింది. అయితే పయ్యా 2 సీక్వెల్‌ సినిమాలలో ఖుషీ కపూర్‌ నటిస్తుందనే వార్తల్లో వాస్తవం లేదని ఆమె తండ్రి, నిర్మాత బోనీ కపూర్‌ సోషల్‌ మీడియా వేదికగా ప్రకటించారు. దాంతో ఆ వదంతికి తెరపడింది. ప్రస్తుతం ఖుషీ కపూర్‌ హిందీలో ఆర్చీస్‌ అనే వెబ్‌ సినిమాలో నటిస్తున్నారు. ఈ సినిమా నవంబర్‌ నుంచి స్ట్రీమింగ్‌ కానుంది.