HCU Land Controversy : సేవ్‌ హెచ్‌సీయూకు రేణుదేశాయ్‌, రష్మీగౌతం మద్దతు..!

ఏపీ డిప్యూటీ సీఎం పవన్‌ కల్యాణ్‌ మాజీ భార్య రేణూ దేశాయ్ ఎక్కువగా పర్యావరణం, జంతువుల గురించి మాట్లాడుతూ ఉంటుంది. ఓ ఎన్జీవోని కూడా రేణూ దేశాయ్ నడుపుతున్నారు. అయితే ప్రస్తుతం హెచ్‌సీయూ భూముల మీద జరుగుతున్న వివాదం మీద రేణూ దేశాయ్ ఆవేదన వ్యక్తం చేశారు. రేవంత్ రెడ్డి ప్రభుత్వం గచ్చిబౌలిలోని 400 ఎకరాల్ని వేలం వేయాల్ని డిసైడ్ అయింది. అందుకే అక్కడి భూముల్ని చదును చేసేందుకు, చెట్లను నరికివేసేందుకు అర్దరాత్రి జేసీబీలను పంపించింది. దీంతో అర్దరాత్రి లేడి పిల్లలు పరుగులు పెడుతున్న వీడియోలు నెట్టింట్లో వైరల్ అయ్యాయి. ఈ భూములను కాపాడాలని హెచ్ సీ యూ విద్యార్థులు కూడా నిరసన వ్యక్తం చేస్తున్నారు. అయితే ఈ క్రమంలో రేణూ దేశాయ్ ఈ వివాదం మీద తన ఇన్ స్టాలో పోస్ట్ వేసింది. మనుషులు తమ దురాశ కోసం ఈ భూమ్మీద చివరకు చెట్లను, జీవాల్ని బతకనిచ్చేట్టు లేరు అని స్పందించింది. ఇక దీన్ని అడ్డుకోలేమా? అన్నట్టుగా ఆవేదన చెందింది. ఆమె పోస్ట్‌లో, “మనుషులు తమ దురాశ కోసం ప్రకృతిని నాశనం చేయడం వెనక ఎంతటి మానవత్వం లేకుండా పోతుంది?” అని ప్రశ్నించింది. ఈ సందర్భంలో ఆమె, “జనతా గ్యారేజ్” సినిమాలో ఎన్టీఆర్ చెప్పిన డైలాగ్స్‌ను జత చేసి, ఈ సమయంలో కూడా ఒక రియల్ హీరో ఉంటే ఎంత బాగుంటుందని ఆకాంక్షిస్తూ రీల్‌ను షేర్ చేసింది. ఒక తల్లిగా నేను విజ్ఞప్తి చేస్తున్నా. అభివృద్ధి అనేది అవసరమే కాకుండా.. ఆ 400 ఎకరాలు కాకుండా ఇంకా ఎక్కడైనా అభివృద్ధి చేయండని విజ్ఞప్తి చేస్తున్నానని ఆమె చేసిన వీడియో కూడా వైరల్‌ అవుతోంది.

ఇక మరో సెలెబ్రిటీ రష్మీగౌతం కూడా స్పందించారు. దీనికి సంబంధించి ఆమె తన ఇన్‌స్టాగ్రామ్ ద్వారా వీడియోను రిలీజ్ చేశారు. ‘నేను ఈ వీడియోను ఏపీ, తెలంగాణలో జరుగుతున్న అభివృద్దికి వ్యతిరేకంగా పోస్ట్ చేయడం లేదు. HCUలో జరుగుతున్న పోరాటం గురించి మీ అందరికీ తెలిసిందే. సోషల్ మీడియా వేదికగా ఈ వివాదంపై స్పందిస్తున్నారు. ఇప్పుడు నేను కూడా.. ఒక అపార్ట్‌మెంట్‌లో కూర్చుని ఈ వీడియో చేస్తున్నారు. కానీ నాకు తెలుసు.. ఈ అపార్ట్‌మెంట్ కట్టేటప్పుడు ఎన్ని చెట్లను తొలగించారో.. ఎన్ని జంతువులకు హాని చేశారో. ఇక్కడ నేను కూర్చుని వీడియో చేయడం చాలా ఈజీనే. కానీ.. ఏది తప్పు ఏది ఒప్పు అనేది ముఖ్యం. ఇప్పుడు ఈ HCU విషయంలో ఏం జరుగుతుంది? లీగల్‌గా ఎలాంటి ఇష్యూస్ ఉన్నాయి? అనేవాటిపై నాకు అంతగా అవగాహన లేదు కాబట్టి.. ఒక సామన్యురాలిగా అభివృద్ది పేరుతో చెట్లను నరుకుతున్న వీడియో చూసిన తరువాత పక్షులు, జంతువులకి ఇబ్బంది కలుగుతుందని అర్థం అయింది. అక్కడ కేవలం పక్షులే కాకుండా.. నెమలి, లేళ్లు కనిపిస్తున్నాయి. ఇలాంటి సమయంలో వాటిని వాటి ఇంటి నుంచి తరిమేయడం ఎంత వరకూ న్యాయం. దయచేసి ఆ పశు, పక్షుల్ని కూడా దృష్టిలో పెట్టుకోండి. ఒక పాజిటివ్ అప్రోజ్‌తో మీ తదుపరి నిర్ణయం తీసుకుంటారని మనస్పూర్తిగా కోరుకుంటున్నాను. ఈ చర్యని ఖండిస్తూ.. చాలామంది గొంతుకలు ఏకం అవుతున్నాయి. దయచేసి తెలంగాణ ప్రభుత్వం ఆ పక్షులు, జంతువులకు పునరావాసం కల్పించే దశగా ఆలోచన చేస్తారని కోరుతున్నాను’ అని వీడియోను ఇన్‌స్టాలో షేర్‌ చేసింది రష్మీగౌతం.