Super Star Krishna : నటశేఖరుడు సూపర్‌స్టార్‌ కృష్ణకు హప్పీ బర్త్‌డే!
ప్రతి ఏడాది సూపర్‌స్టార్‌ కృష్ణ ఇప్పటికీ మన మధ్య ఉన్నట్టుగానే ఉంది! ఆయన పుట్టిన రోజును గ్రాండ్‌గా సెలబ్రెట్‌ చేస్తున్నట్టుగానే ఉంది. ఆయన లేరంటే నమ్మశక్యంగా అనిపించడం లేదు. తెలుగు ఇండస్ట్రీని అంతగా ప్రభావితం చేశారాయన! నిజంగానే తెలుగు సినీ పరిశ్రమంలో ఆయనో సాహసి. కదిలే బొమ్మలను మరింత వేగంగా కదిలించిన ఘనుడు. విజయాలకు పొంగిపోని వినమ్రుడు. అపజయాలకు వెరవని ధీరోధాత్తుడు. హీరో అంటే కృష్ణనే! ఆయనే నిర్వచనం. మరొకరిని అది అంతగా నప్పదు. జెమ్స్‌బాండ్‌ అన్నా, గూఢచారి అన్నా, కౌబాయ్‌ అన్నా, అసాధ్యుడన్నా, అఖండుడన్నా ఆయనే! తెలుగు ప్రేక్షకులకు కొత్తదనాన్ని పరిచయం చేయడంలో ఎప్పుడూ ముందుండేవారు! అందుకే కృష్ణంటే అందరికి అంత ఇష్టం!
మనిషి జీవితంలో ఆటుపోట్లు, ఉత్థాన పతనాలు సహజం. ఆనంద విషాదాలు సర్వ సాధారణం. ఆశ నిరాశల దాగుడు మూతలు అనివార్యం. వీటన్నింటినీ ఎదుర్కొని నిలవగలవాడే సాహసి. ఈ గుణగణాలన్నీ ఉన్నాయి కాబట్టే కృష్ణ సాహసి అయ్యారు. సాహసాన్ని మారుపేరుగా మార్చుకున్నారు.
Super Star Krishna Super Star Krishna
-
- ప్రతి ఏడాది సూపర్‌స్టార్‌(Krishna) కృష్ణ ఇప్పటికీ మన మధ్య ఉన్నట్టుగానే ఉంది! ఆయన పుట్టిన రోజును గ్రాండ్‌గా సెలబ్రెట్‌ చేస్తున్నట్టుగానే ఉంది. ఆయన లేరంటే నమ్మశక్యంగా అనిపించడం లేదు. తెలుగు ఇండస్ట్రీని అంతగా ప్రభావితం చేశారాయన! నిజంగానే తెలుగు సినీ పరిశ్రమంలో ఆయనో సాహసి. కదిలే బొమ్మలను మరింత వేగంగా కదిలించిన ఘనుడు. విజయాలకు పొంగిపోని వినమ్రుడు. అపజయాలకు వెరవని ధీరోధాత్తుడు. హీరో అంటే కృష్ణనే! ఆయనే నిర్వచనం. మరొకరిని అది అంతగా నప్పదు. జెమ్స్‌బాండ్‌ అన్నా, గూఢచారి అన్నా, కౌబాయ్‌ అన్నా, అసాధ్యుడన్నా, అఖండుడన్నా ఆయనే! తెలుగు ప్రేక్షకులకు కొత్తదనాన్ని పరిచయం చేయడంలో ఎప్పుడూ ముందుండేవారు! అందుకే కృష్ణంటే అందరికి అంత ఇష్టం! మనిషి జీవితంలో ఆటుపోట్లు, ఉత్థాన పతనాలు సహజం. ఆనంద విషాదాలు సర్వ సాధారణం. ఆశ నిరాశల దాగుడు మూతలు అనివార్యం. వీటన్నింటినీ ఎదుర్కొని నిలవగలవాడే సాహసి. ఈ గుణగణాలన్నీ ఉన్నాయి కాబట్టే కృష్ణ సాహసి అయ్యారు. సాహసాన్ని మారుపేరుగా మార్చుకున్నారు. ఎన్టీఆర్‌(NTR), ఎఎన్‌ఆర్‌ల తర్వాత అంతటి ఫాలోయింగ్‌ను సంపాదించిన సెకండ్‌ జనరేషన్‌ హీరో కృష్ణనే! పదండి ముందుకు సినిమాలో చమక్కున మెరిసి, కులగోత్రాలు, పరువు ప్రతిష్ట వంటి సినిమాల్లో కనీ కనబడని వేషాలు వేసి, తేనెమనసులుతో ఏకంగా హీరో అయిపోయి, ముచ్చటగా మూడో సినిమా గూఢచారి 116తో అశేష అభిమానులను సంపాదించుకున్న కృష్ణ....ఇక ఆ తర్వాత వెనక్కి తిరిగి చూస్తే ఒట్టు.
-
- తెలుగులో ఈస్ట్‌మన్‌కలర్‌లో తీసిన మొదటి సాంఘిక చిత్రం తేనె మనసులు. అందులో కథానాయకుడు కృష్ణే. తెలుగు మొట్ట మొదటి గూఢచారి సినిమా గూఢచారి 116. ఇందులో హీరో కూడా కృష్ణనే! మొట్టమొదటి కౌబాయ్‌ సినిమా మోసగాళ్లకు మోసగాడు. ఇందులో కూడా ఆయనే హీరో! మొట్టమొదటి సినిమా స్కోప్‌ కలర్‌ సినిమా అల్లూరి సీతారామరాజు. ఈ సినిమాను నిర్మించింది, సీతారామరాజు పాత్రను పోషించింది కృష్ణే! సెవంటీ ఎంఎంను సింహాసనం ద్వారా తెలుగు ప్రేక్షకులకు పరిచయం చేసింది కూడా కృష్ణే! ఖర్చుకు వెనుకాడకుండా భారీ సినిమాలు తీయడం ఆయనకు అలవాటు. లేటెస్ట్‌ టెక్నాలజీని ఎప్పటికప్పుడు తెలుగువాళ్లకు అందించాలన్న తపన ఆయనది. స్టార్‌డమ్‌ అనేది ఒక్క రోజులో రాదు. దానికి చాలా కష్టపడాలి. కృష్ణ అదృష్టమేమిటో కానీ మూడో సినిమాతోనే కృష్ణ మాస్‌కి దగ్గరయ్యారు. అదలా కంటిన్యూ చేస్తూనే వచ్చారు. స్టార్‌ కావడం ఈజీనే! స్టార్‌డమ్‌ను సాధించడమే కష్టం. హీరోలు చాలా మంది ఉంటారు. చాలా కాలం హీరోగానే వుండటమనేది కొద్ది మందికే సాధ్యం. అందులో కృష్ణ ఒకరు. తెలుగు సినిమాలకు డిష్యూం డిష్యూం నేర్పింది కృష్ణే... తెలుగు సినిమాల్లో పిస్టోలు ఢాం ఢాంలను తీసుకొచ్చింది కృష్ణనే! కృష్ణది గుంటూరు జిల్లా తెనాలి తాలూకా బుర్రిపాలెం..ఘట్టమనేని రాఘవయ్య చౌదరి, నాగరత్నమ్మలకు 1943, మే 31న జన్మించారు. ఐదుగురు సంతానంలో కృష్ణే పెద్దవాడు. కృష్ణ అసలు పేరు ఘట్టమనేని శివరామకృష్ణ.
-
- సినిమాల్లోకి వచ్చాకే కృష్ణ అయ్యారు. కృష్ణ బాల్యమంతా తెనాలిలోనే(Thenali) గడిచింది. పదో తరగతి వరకు అక్కడే చదివారు. ఏలూరు సీఆర్‌ రెడ్డి కాలేజీలో(CR Reddy College) బీఎస్సీ పూర్తి చేశారు. మురళీమోహన్‌, నిర్మాత-దర్శకుడు క్రాంతి కుమార్‌లు అప్పుడాయనకు రూమ్‌మెట్స్‌. డిగ్రీ అయిందో లేదో కృష్ణకు పెళ్లి కూడా చేసేశారు తల్లిదండ్రులు. 19వ ఏట ఇందిరాదేవితో కృష్ణకు వివాహమైంది. తెనాలి రత్న టాకీస్‌లో పాతాళభైరవి సినిమా చూసిన తర్వాత కృష్ణకు సినిమాలపై మోజు కలిగింది. ఎన్టీయార్‌ అభిమాన నటుడయ్యారు. ఆయన మనసు సినిమా రంగంపైపుకు లాగింది. ఇంట్లో చెప్పేశారు. తండ్రి ప్రోత్సాహం కూడా దొరికింది. అంతే, మద్రాస్‌ బండెక్కేశారు. తిన్నగా నిర్మాత చక్రపాణి దగ్గరకెళ్లారు. చక్రపాణి కృష్ణను ఎగాదిగా చూసి 'బాగున్నావయ్యా, కానీ నీ వయసు 19 ఏళ్లే అంటున్నావు. ఇంత చిన్న వయసులో హీరో కావడం కష్టం. రామారావును మేము షావుకారులో బుక్‌ చేసినప్పుడు ఆయన వయసు 28. కాబట్టి కొంత కాలం వెయిట్‌ చేయి' అని చెబుతూ 'ఎలాగూ ఇంత దూరం వచ్చావు కాబట్టి ఓసారి రామారావునూ చూద్దూ కాని పద' అంటూ పొన్నలూరి బ్రదర్స్‌ స్టూడియోకి తీసుకెళ్లాడు. అక్కడ ఎన్టీయార్‌ది ఏదో జానపద సినిమా షూటింగ్‌ జరుగుతుంది. ఫస్ట్‌టైమ్‌ రామారావును చూసి థ్రిల్లయారు కృష్ణ. చక్రపాణి ఎన్టీయార్‌కు పరిచయం చేసి విషయమంతా చెప్పారు... ఆయనదీ అదే మాట. 'మీరు చాలా యంగ్‌గా వున్నారు బ్రదర్‌. మీరు కొంత కాలం ఆగితే బాగుంటుంది. అయితే ఈ లోపల టైమ్‌ వేస్ట్‌ చేసుకోకుండా నాటకాలు గట్రాలు వేస్తూ ఉండండి. అనుభవం వస్తుంది. పర్సనాలిటీ పెరుగుతుంది' అని సలహా ఇచ్చారు ఎన్‌.టి. రామారావు. ఎన్టీయార్‌ సలహా పాటించి కృష్ణ నాటకాలు వేయడం మొదలు పెట్టారు.
-
- నాటకాలు వేస్తుండగానే ఎల్‌.వి.ప్రసాద్‌(Prasad) నుంచి పిలుపొచ్చింది. కొడుకులు కోడళ్లు(Kodukulu Kodallu) అనే సినిమా తీస్తున్నాం. వెంటనే బయలు దేరమన్నది పిలుపులోని సారాంశం. సినిమా కోసం బాలయ్య, రమణమూర్తి, శోభన్‌బాబు ఆల్‌రెడీ బుక్‌ అయ్యారు. హీరోగా ఎంట్రీ ఇద్దామనుకుంటే వన్‌ ఆఫ్‌ ది హీరోస్‌గా చిన్న వేషం ఇస్తామనడం కృష్ణకు ఒకింత బాధకలిగించినా ఫస్ట్‌ ఆఫర్‌ కాబట్టి ఒప్పేసుకున్నారు. వెంటనే మద్రాస్‌లో వాలిపోయారు. సినిమా కోసం నెల రోజుల పాటు రిహార్సల్స్‌ చేశారు. ఎందుకో సినిమా ఆగిపోయింది. నలుగురిలో మిగితా ముగ్గరు మాత్రం అప్పటికీ సినిమాల్లో నటిస్తున్నారు. కృష్ణకు నిరాశేసింది. అయినా ఆత్మ విశ్వాసం మాత్రం సడల్లేదు. అక్కడే వుంటూ రెండు మూడు సినిమాల్లో చిన్న వేషాలేశారు. అంతలో తేనె మనసులు సినిమాలో హీరో అవకాశం లభించింది. ఫస్ట్‌ పిక్చర్‌ హిట్టయినా కృష్ణకేమీ ఆఫర్ల మీద ఆఫర్లు రాలేదు. తెనాలి వెళ్లిపోయి ఆరు నెలలు హాయిగా విశ్రాంతి తీసుకున్నారు. ఈ లోపు ముందుగా చేసుకున్న అగ్రిమెంట్‌ ప్రకారం రెండో సినిమా కన్నెమనసులు షూటింగ్‌ మొదలైంది. నెలరోజులు గడవక ముందే ఓ రోజు ఆదుర్తి సుబ్బారావు కృష్ణను పిలిచి 'డూండీ ఏదో కొత్త సినిమా ప్లాన్‌ చేస్తున్నారట. నిన్నే హీరోగా తీసుకోవాలనుకుంటున్నాడట. ఓసారి వెళ్లి కలువు' అని చెప్పారు. వెళ్లి కలిసారు కృష్ణ. అలా గూఢచారి 116లో హీరో అయ్యారు కృష్ణ. కన్నెమనసులు, గూఢచారి 116 సినిమాలు రెండు వారాల తేడాతో విడుదలయ్యాయి. కన్నెమనసులు యావరెజ్‌గా పోయింది. గూఢచారి 116 మాత్రం సూపర్‌ డూపర్‌ హిట్టయింది. అప్పటి వరకు ఎన్‌.టి.ఆర్‌, ఎ.ఎన్‌.ఆర్‌ సినిమాలు మాత్రమే బి.సి.సెంటర్లలో బాగా ఆడేవి. కృష్ణకు మాత్రం మూడో సినిమాకే మాస్‌ ఇమేజ్‌ వచ్చేసింది. ఈ సినిమా సి.ఐ.డి 116గా తమిళంలో డబ్‌ అయింది. అక్కడ కూడా బాగా ఆడింది. ఓవర్‌నైటే కృష్ణకు స్టార్‌డమ్‌ వచ్చింది. దాదాపు 20 మంది నిర్మాతలు కృష్ణను బుక్‌ చేయడానికి ముందుకొచ్చారు. ఎవరికి ఏ సినిమా ఎందుకు చేస్తున్నాడో కూడా తెలియనంత బిజీ అయ్యారు. భేషజం లేని మనిషి కృష్ణ. అందుకే అన్నేసి మల్టీస్టారర్‌ సినిమాలు చేయగలిగారు. నొప్పింపక తానొవ్వక ఇండ్రస్టీలో మంచి మనిషిగా పేరు తెచ్చుకున్నారు. దాదాపు అగ్రశ్రేణి దర్శకులందరి సినిమాల్లోనూ చేసిన నటుడాయన. కీర్తి కండూతి లేని సహృదయులు. ఆయనతో సినిమాలు తీసిన నిర్మాతలెవ్వరూ నష్టపోలేదు.
-
- తొలిచిత్రం హిట్టయినా మూడో చిత్రం గూఢచారి 116(Gudachari116) ఇచ్చిన సక్సెస్‌ కృష్ణకి ఎంతో ఆనందాన్నిచ్చింది. తరవాత కాంతారావుతో కలిసి ఇద్దరుమొనగాళ్లు చేశారు. తొలిచిత్రంలో రాంమోహన్‌తో కలిసి నటించారు కృష్ణ. అయితే అప్పటికి స్టార్‌ ఇమేజ్‌ లేదు. కాబట్టి అది మల్టిస్టారర్‌ చిత్రంగా లెక్కకు రాదు. తరవాత కాలంలో ఎన్టీఆర్‌, ఎ.ఎన్‌.ఆర్‌, శోభన్‌బాబు, కృష్ణంరాజు, చిరంజీవి, రజనీకాంత్‌ ఇలా అందరితో కలిసి కృష్ణ ఎన్నో మల్టిస్టారర్‌ చిత్రాల్లో నటించారు. అయితే కృష్ణ చేసిన మొదటి మల్టిస్టారర్‌ చిత్రంగా ఇద్దరు మొనగాళ్లు నిలిచిపోతుంది. తరవాతి చిత్రం బాపు డైరెక్షన్లో సాక్షి. విజయనిర్మలతో మొదటిసారి కాంబినేషన్‌. అప్పుడు మొదలైన ఆ కాంబినేషన్‌ దశాబ్దాల తరబడి సాగింది. యాభై చిత్రాల్లో ఇద్దరూ కలిసి నటించారు. వాటిలో ముప్ఫై చిత్రాలు విజయనిర్మల దర్శకత్వంలో వచ్చినవే! పులిదిండిలో సాక్షి షూటింగ్‌ జరిగినప్పుడు, అక్కడ ఉన్న మీసాల కృష్ణుడి గుళ్లో కృష్ణ, విజయనిర్మలల పెళ్లిసీన్‌ తీశారు. ఈ టైమ్‌లోనే ఓ తమాషా జరిగింది. షూటింగ్‌ టైమ్‌లో హాస్యనటుడు రాజబాబు ఆ గుడి గురించి చెబుతూ... 'ఇది చాలా పవర్‌ఫుల్‌ గుడి. ఇక్కడ సినిమా పెళ్లి జరిగింది. కానీ తొందరలోనే మీకు నిజం పెళ్లీ జరుగుతుంది' అని అన్నాట్ట. కృష్ణ నమ్మలేదు గానీ చివరికి ఆ సెంటిమెంటే నిజమయింది. . తరవాత పరిచయం ప్రణయంగా మారి, తిరుపతిలో కృష్ణ, విజయనిర్మలల పెళ్లి నిజంగానే జరిగిపోయింది. కృష్ణ సంక్రాంతి సెంటిమెంట్‌ అసాధ్యుడుతో మొదలైంది. అసాధ్యుడు కృష్ణ పదకొండో సినిమా. 1968 సంక్రాంతికి అది రిలీజైంది. అదే సంక్రాంతికి కె.వి.రెడ్డి డైరెక్షన్లో ఎన్టీయార్‌, బి సరోజాదేవి కాంబినేషన్‌లో ఉమాచండీగౌరి శంకరుల కథ కూడా విడుదలైంది.
-
- అయితే అసాధ్యుడు హిట్టయింది. విజయావారి చరిత్రలో ఉమా చండీ గౌరి శంకరుల కథ తొలి ఫెయిల్యూర్‌ చిత్రంగా నమోదైంది. అప్పట్నుంచి సంక్రాంతికి విడుదలైన కృష్ణ సినిమాలన్నీ దాదాపుగా విజయవంతమయ్యాయి. అసాధ్యుడు తర్వాత కృష్ణ మరీ బిజీ అయిపోయారు. ఎంతగా అంటే రోజుకు మూడు షిప్టులు చేసేటంతగా! అలా వర్క్‌ చేసి చేసి అలసిపోయి కాస్త కునుకు తీస్తుంటే ఓ నిర్మాత వచ్చి 'ఆ నిద్రపోయేదేదో మా డ్రెస్‌ వేసుకుని నిద్రపోండి. కథ ప్రకారం మీరు నిద్రపోతున్న సీన్‌ వుంది.మేము తీసుకుని వెళ్లిపోతాం' అనేంత వరకు వచ్చింది. 1965లో ఒక్క సినిమాతో ప్రారంభమైన కృష్ణ కెరీర్‌ 66లో రెండు.. 67లో ఏడు సినిమాలు. 68లో నేనంటేనేనే, లక్ష్మీ నివాసం, నాగేశ్వరరావుతో మంచి కుటుంబం. రామారావుతో నిలువుదోపిడి. విశ్వనాథ్‌ డైరెక్షన్లో ఉండమ్మా బొట్టు పెడతా ఇలా పదకొండు సినిమాల వరకు వెళ్లింది. ఆ తర్వాతి రెండేళ్లు ఏకంగా ఏడాదికో పదిహేను సినిమాల చొప్పున కృష్ణ నటించారు. కృష్ణ మంచి నిర్మాత కూడా. ఆయన బ్యానర్‌లో తెలుగు చిత్ర సీమలో మైలురాళ్లుగా నిలిచిపోయే చిత్రాలు అనేకం వచ్చాయి. వ్యయ ప్రయాసలకు జడవనివాడు కాబట్టే ఆయన సినిమాల్లో రిచ్‌నెస్‌ కనిపిస్తుంది. సీతారామరాజు నుంచి ఈనాడు మీదుగా సింహాసనం వరకు అన్నీ సన్సేషన్లే. ఇలా సినిమాలు చేస్తున్న కాలంలోనే కృష్ణ సొంత బ్యానర్‌ పద్మాలయ ఫిలింస్‌ సంస్థను మొదలు పెట్టారు. ఆ బ్యానర్‌పై తొలి ప్రయత్నంగా అగ్నిపరీక్ష తీశారు. అది పెద్దగా విజయవంతం కాలేదు. కృష్ణలో కసి పెరిగింది. నెక్ట్స్‌ అటెంప్ట్‌లో మోసగాళ్లకు మోసగాడు తీశారు. ఆరుద్ర రచన. కె.ఎస్‌.ఆర్‌,దాస్‌ డైరెక్టర్‌. రాజస్థాన్‌ థార్‌ ఎడారిలో కొంత భాగం. సిమ్లాలో మరికొంత భాగం పిక్చరైజ్‌ చేశారు. సినిమా సెన్సేషనల్‌ హిట్‌ అయింది. సినిమా ప్రివ్యూ చూసిన ఎన్టీయార్‌ ఖచ్చితంగా హిట్టవుతుందని చెప్పారు. ఈ సినిమా ఇంగ్లీషు, తమిళం, హిందీ ఇలా అన్ని భాషల్లోకి డబ్‌ అయింది. అన్ని చోట్లా హిట్టే! మొదటి పాన్‌ ఇండియా సినిమా ఇదేనేమో! కృష్ణను ఆంధ్రా జేమ్స్‌బాండ్‌గా పిలవడం మొదలు పెట్టారు జనం. ఆ తర్వాత పండంటి కాపురం తీశారు.
-
- అదీ విజయవంతమైంది. కృష్ణకు మహిళా అభిమానులు తోడయ్యింది ఈ సినిమాతోనే! అంతకు ముందు ఎన్టీయార్‌తో స్త్రీ జన్మ, నిలువుదోపిడి, విచిత్ర కుటుంబం సినిమాల్లో కలిసి నటించినా దేవుడు చేసిన మనుషులు సినిమాతోనే వీరిద్దరి కాంబినేషన్‌కు క్రేజ్‌ వచ్చింది. అల్లూరి సీతారామారాజు సినిమా కృష్ణ నట జీవితంలో ఓ మైలు రాయిగా నిలిచిపోయింది. ఇండస్ట్రీ నుంచి నెగటివ్‌ రెస్పాన్స్‌ వచ్చినా, ఎవరెన్ని కామెంట్లు చేసినా పట్టించుకోకుండా ధైర్యంగా ఆ సినిమా తీశారు. అన్నట్టు కృష్ణ నటించిన వందో సినిమా ఇది. సీతారామరాజు తర్వాత వచ్చిన సినిమాలన్నీ ఫ్లాపులే. దాదాపు పదిహేను సినిమాల వరకు ఇదే పరిస్థితి. పదేళ్ల పాటు విసుగు విరామం లేకుండా రోజుకు మూడు షిఫ్టులు పని చేసిన కృష్ణ కు సినిమాలు లేకుండా పోయాయి. సొంత బ్యానర్‌లో వచ్చిన పాడిపంటలు మళ్లీ కృష్ణకు లైఫ్‌ ఇచ్చింది. సినిమా తర్వాత కృష్ణ వందలకొద్దీ సినిమాలు చేశారు. అందులో సూపర్‌ హిట్లున్నాయి. హిట్లున్నాయి. యావరేజ్‌లున్నాయి. ఫ్లాపులున్నాయి. అయినా కృష్ణ మాత్రం సూపర్‌స్టార్‌గానే వున్నారు. తానో గొప్ప యాక్టర్‌నని కృష్ణ ఏనాడు చెప్పుకోలేదు. బిరుదులకు ఆశపడలేదు.
-
- అవార్డుల కోసం వెంపర్లాడలేదు. మూడువందల యాభైకి పైగా సినిమాలలో నటించిన ఏకైక హీరో కృష్ణనే! నిర్మాతల పాలిటి పెన్నిధి కృష్ణ.. అందుకే .ఆయనతో సినిమా తీసిన నిర్మాతలు మళ్లీ మళ్లీ తీస్తారు. కృష్ణది గొప్ప సెన్సాఫ్‌ హ్యూమర్‌.. బాపు డైరెక్షన్లో కృష్ణావతారం అనే సినిమా వచ్చింది. సినిమా షూటింగప్పుడు 'పాపం బాపుగారు సాక్షి తర్వాత పదిహేనేళ్లయింది కదా! నటనలో ఇంప్రూవ్‌ అయివుంటాననుకుని రెండో టేక్‌ అడుగుతున్నారు. నేను ఏం మారలేదని హామీ ఇవ్వండి' అని డాన్స్‌ డైరెక్టర్‌ శ్రీనుతో చెప్పి పకపకా నవ్వేశారట కృష్ణ. ఆ సినిమాతో బాపుకు బాగా డబ్బులొచ్చాయి. పాత అప్పులన్నీ తీర్చేసుకోగలిగారు. ప్రతి నటుడికి వెనక్కి తిరిగి చూసుకుంటే గుర్తుకొచ్చే సినిమాలు కొన్ని వుంటాయి. కృష్ణకూ వున్నాయి. ఇప్పుడొచ్చే నటులకు లేనిది ఇదే! జయాపజయాలను పక్కన పెడితే ఎన్టీయార్‌ సినిమాలకు పోటీ పెట్టడం ఒక్క కృష్ణ వల్లనే సాధ్యమైంది. కృష్ణ దాదాపు అన్ని రకాల పాత్రలూ వేశాడు. సాంఘికాలు, జానపదాలు, చారిత్రకాలు, పౌరాణికాలు, ఫైటింగ్‌ సినిమాలు, అపరాధపరిశోధనా సినిమాలు, బాండ్‌ సినిమాలు, ఫ్యామిలీ ఎంటరైనర్లు అన్నీ చేశారు. అడపదడపా కామెడీ రోల్సూ వేశారు. అన్నింటినీ పండించారు. అన్నింటికీ న్యాయం చేశారు. ప్రతి పుట్టిన రోజున కృష్ణను తల్చుకోవడం పరిపాటే కానీ ఈసారి జయంతి సందర్భంగా కృష్ణ గురించి నాలుగు మాటలు చెప్పుకోవడమే కాసింత బాధగా ఉంది.
Next Story
