#PAPA-Phalana Abbayi Phalana Ammayi : ‘ఫలానా అబ్బాయి ఫలానా అమ్మాయి’ నుంచి పెప్పీ నెంబర్ 'కఫీఫీ' సాంగ్ విడుదల

‘ఊహలు గుసగుసలాడే‘, ‘జ్యో అచ్యుతానంద’ వంటి ఫీల్ గుడ్ సినిమాలతో ఘన విజయాలను అందుకున్న యంగ్ హీరో నాగశౌర్య. డైరెక్టర్ శ్రీనివాస్ అవసరాల కలయికలో వస్తున్న హ్యాట్రిక్ ఫిల్మ్ ‘ఫలానా అబ్బాయి ఫలానా అమ్మాయి’. ‘కార్తికేయ-2’ ధమాకా వంటి వరుస బ్లాక్ బస్టర్లతో దూసుకుపోతున్న ప్రముఖ నిర్మాణ సంస్థ పీపుల్ మీడియా ఫ్యాక్టరీ, దాసరి ప్రొడక్షన్స్‏తో కలిసి ఈ చిత్రాన్ని నిర్మించింది. టీజీ విశ్వ ప్రసాద్, పద్మజ దాసరి నిర్మాతలగా వ్యవహరిస్తున్నారు. వివేక్ కూచిభొట్ల సహ నిర్మాతగా వ్యవహరిస్తున్న ఈ చిత్రంలో మాళవిక నాయర్ హీరోయిన్‏గా నటించింది. ఈ చిత్రంపై ప్రేక్షకుల్లో మంచి అంచనాలు ఉన్నాయి. ఇప్పటికే విడుదలైన టీజర్, ట్రైలర్, సాంగ్స్ ప్రేక్షకులను విశేషంగా ఆకట్టుకున్నాయి. మార్చి 17న ఈ చిత్రం థియేటర్లలో భారీస్థాయిలో విడుదల కానుంది.

ఈ సినిమాలో మొత్తం ఐదు పాటలున్నాయి. నాలుగు పాటలకు బ్యాక్‏గ్రౌండ్ మ్యూజిక్ కళ్యాణి మాలిక్ అందించగా.. ఒక పాటను వివేక్ సాగర్ స్వరపరడం విశేషం. కళ్యాణి మాలిక్ స్వరపరిచిన పాటల్లో ఇప్పటికే మూడు పాటలు విడుదలై ఆకట్టుకున్నాయి. ముఖ్యంగా 'కనుల చాటు మేఘమా' పాటకు అద్భుతమైన స్పందన లభించింది. ఇక ఇప్పుడు ఈ చిత్రం నుంచి వివేక్ సాగర్ సంగీతం సమకూర్చిన 'కఫీఫీ' పాట విడుదలైంది. 'కఫీఫీ' లిరికల్ వీడియోను బుధవారం ఉదయం విడుదల చేశారు మేకర్స్. ‘ఫలానా అబ్బాయి ఫలానా అమ్మాయి’ నుండి ఇప్పటిదాకా విడుదలైన పాటలు హాయిగా, ఆహ్లాదకరంగా సాగే మెలోడీలు అయితే.. ఈ పెప్పీ నెంబర్ మాత్రం అందరిలో ఉత్సాహాన్ని నింపేలా ఉంది. 'కఫీఫీ' అంటూ అందరూ కాలు కదిపేలా అద్బుతమైన బాణీ సమకూర్చారు వివేక్. "నలుగురిలో ఉంటే.. చిలిపిగ పోతుంటే.. చనువుకి నో నో చెప్పేదే కఫీఫీ" అంటూ పాట సాగింది. పాట సందర్భానికి, బాణీకి తగ్గట్లుగా కిట్టు విస్సాప్రగడ అందించిన సాహిత్యం అందంగా, అర్థవంతంగా ఉంది. "ఇది అది కాదంటూ.. వివరము వేరంటూ.. పరిమితిలోనే ఉంచేదే కఫీఫీ", " పరిధులు లేని వింత సహవాసం పరిగెడుతుంటే తగదుగా" అంటూ మళ్లీ మళ్లీ పాడుకునేలా క్యాచీ లిరిక్స్‏తో లోతైన భావాన్ని పలికించారు. గాయకులు బెన్ హ్యూమన్, విష్ణుప్రియ తమ మధుర గాత్రంతో పాటను ఎంతో ఉత్సాహంగా ఆలపించారు.

'కఫీఫీ' సాంగ్ ఎంత ఎనర్జిటిక్‏గా సాగిందో.. లిరికల్ వీడియోలో నాయకానాయికలు నాగశౌర్య, మాళవిక అంతకంటే ఎనర్జిటిక్‏గా కనిపించారు. పబ్‏లో జరుగుతున్న పార్టీలో స్నేహితులతో కలిసి నాయకానాయికలు ఉత్సాహంగా చిందేయడం అలరిస్తోంది. ముఖం మీద చిరునవ్వుతో ఇద్దరూ ఎంతో ఆనందంగా కనిపిస్తున్నారు. నువ్వా నేనా అన్నట్లుగా పోటీపడి డ్యాన్స్ చేస్తున్నారు. పాటలోని ఉత్సాహాన్ని, నాయకానాయికలు ఉత్సాహాన్ని రెట్టింపు చేస్తూ యశ్ మాస్టర్ కొరియోగ్రాఫ్ చేసిన డాన్స్ స్టెప్పులు ఆకట్టుకుంటున్నాయి. మొత్తానికి ఈ పాటకి థియేటర్లలో అద్భుతమైన స్పందన లభించడం ఖాయమనిపిస్తోంది.

ఈ ‘ఫలానా అబ్బాయి ఫలానా అమ్మాయి’ మూవీలో నటీనటులుగా నాగశౌర్య, మాళవిక నాయర్, శ్రీనివాస్ అవసరాల, మేఘ చౌదరి, అశోక్ కుమార్, అభిషేక్ మహర్షి, శ్రీవిద్య వారణాసి సౌమ్య చలంచర్ల, హరిణిరావు, అర్జున్ ప్రసాద్ ఉన్నారు. శ్రీనివాస్ అవసరాల డైరెక్షన్ లో ఈ చిత్రం తెరకిక్కింది. నిర్మాతలుగా టీజీ విశ్వప్రసాద్, పద్మజ దాసరి ఉండగా సహ నిర్మాతగా వివేక్ కూచిభొట్ల ఉన్నారు. డీవోపీగా సునీల్ కుమార్ నామా, సంగీతం కల్యాణి మాలిక్ అందిస్తున్నారు. ఈ చిత్రం మార్చి 17న విడుదలకు కానుంది