Madhavan and Kangana : మాధవన్‌, కంగనా రనౌత్‌ మరో సినిమా.. ఈ సారి అంతకు మించి.!

తను వెడ్స్‌ మను(Tanu Weds Manu) సినిమా ఎంత పెద్ద హిట్టో ప్రత్యేకంగా చెప్పాల్సిన పని లేదు. అందులో హీరో మాధవన్‌(Madhavan), హీరోయిన్‌ కంగనా రనౌత్‌(Kangana Ranaut)లే నటించారు. నాలుగేళ్ల తర్వాత ఆ సినిమాకు సీక్వెల్‌గా తను వెడ్స్‌ మను రిటర్న్స్‌ వచ్చింది. ఇందులో కూడా మాధవన్‌, కంగనా రనౌత్‌లు హీరో హీరోయిన్లుగా నటించారు. అలైప్పాయుదే సినిమా ద్వారా తమిళ సినీ పరిశ్రమకు పరిచయమైన మాధవన్‌ చాక్లెట్‌ బాయ్‌గా గుర్తింపు పొందాడు. ఆ సినిమా తర్వాత అన్ని రకాల పాత్రలు పోషించాడు. ఇక కంగానా రనౌత్‌ గురించి ఏం చెబుతాం? బాలీవుడ్‌లో ఆమె ఓ సంచలనం. మొన్నీమధ్యనే తమిళంలో తలైవి అనే సినిమాలో దివంగత ముఖ్యమంత్రి జయలలిత పాత్రలో నటించారు. తమిళంలోనూ అభిమానులను ఏర్పరుచుకున్నారు. మాధవన్‌, కంగన ఇద్దరూ బహుభాషా నటులే. ఇద్దరూ దర్శకులుగా కూడా పని చేశారు. 2015లో తను వెడ్స్‌ మను రిటర్న్స్‌ సినిమా వచ్చింది. ఆ తర్వాత వీరిద్దరూ కలిసి పని చేయలేదు. ఎనిమిదేళ్ల విరామం తర్వాత ఈ జంట ముచ్చటగా మూడోసారి కలిసి నటించబోతున్నది. ఇది తమిళ సినిమా కావడం విశేషం. ఈ సినిమాను ట్రైడెంట్‌ ఆర్ట్స్‌ సంస్థ అధినేత రవీంద్రన్‌ పాన్‌ ఇండియా స్థాయిలో నిర్మించబోతున్నారు. ఇటీవల వచ్చిన అయోథి సినిమాతో మంచి పేరు తెచ్చుకున్న దర్శకుడు మూర్తినే ఈ సినిమాను డైరెక్ట్‌ చేయబోతున్నారు. ఇతర నటీనటులు, సాంకేతిక వర్గం ఎంపిక జరుగుతున్నది. దీనికి సంబంధించిన అధికారిక ప్రకటన త్వరలో వెలువడనుంది.