Ranveer Singh-Alia : రణ్‌వీర్‌, అలియాభట్‌ సినిమాపై సెన్సార్‌ తీవ్ర ఆగ్రహం

సుమారు ఏడేళ్ల విరామం తర్వాత కరణ్‌ జోహార్‌(Karan Johar) మెగా ఫోన్‌ పట్టుకున్నారు. ఆయన దర్శకత్వం వహించిన రాఖీ ఔర్‌ రాణి కీ ప్రేమ్‌ కహానీ(Rockey Aur Rani Ki Prem Kahani) సినిమా ఈ నెల 28న విడుదల కాబోతున్నది. ఈ రొమాంటిక్‌ ఎంటర్‌టైనర్‌పై ప్రేక్షకులు అమితాసక్తిని పెట్టుకున్నారు. ఈ సినిమాలో రణ్‌వీర్‌సింగ్‌(Ranveer Singh), అలియాభట్‌(alia Bhatt) ప్రధాన పాత్రల్లో నటించారు. అయితే ఈ సినిమాలో కొన్ని సంభాషణలు, సన్నివేశాలపై సెన్సార్‌బోర్డు తీవ్ర అభ్యంతరం తెలిపింది. అశ్లీల పదాలతో పాటు రాజకీయ సంబంధమైన డైలాగులను తొలగించాలని సెన్సార్‌ బోర్డు ఆదేశించింది. సెన్సార్‌ ఆదేశాల మేరకు రవీంద్రనాథ్‌ ఠాగూర్‌కు సంబంధించిన ఓ దృశ్యాన్ని పూర్తిగా తొలగించారని తెలిసింది. పశ్చిమబెంగాల్‌ ముఖ్యమంత్రి మమతా బెనర్జీ నేపథ్యంలో వచ్చే ఓ సుదీర్ఘమైన డైలాగ్‌ను కూడా మార్చాలని మూవీ మేకర్స్‌కు సెన్సార్‌ సూచించింది. ఓ మద్యపాన బ్రాండ్‌ పేరును ఉపయోగించడంతో పాటు మహిళల లోదుస్తుల గురించిన పదాల పట్ల కూడా సెన్సార్‌ బోర్డ్‌ ఆగ్రహం వ్యక్తం చేసింది. మహిళలను కించపరిచేలా ఆ పదాలు ఉన్నాయని వ్యాఖ్యానించింది. ఈ చిత్రంలో జయాబచ్చన్‌, షబానా ఆజ్మీ తదితరులు కీలక పాత్రలను పోషించారు.