China Hubei : పెళ్లికి ముందు యువకుడిగా మారిన యువతి

మహాభారతంలో శిఖండి పాత్ర గురించి తెలుసుగా! ద్రుపదుడికి పుట్టిన కూతురు (పూర్వజన్మలో అంబ) తన ప్రతిజ్క్ష నెరవేర్చుకోవడం కోసం శివనామస్మరణ చేస్తుంది. తపస్సు చేస్తుంది. పురుషుడిగా మారుతుంది. ఇది భారతంలో ఓ కథ. కానీ చైనాలో(china) ఏ దేవుడు వరమియ్యకుండానే యువతి యువకుడిగా మారింది. కొన్ని రోజులలో పెళ్లి చేసుకోవాల్సిన ఆమె తన పొట్టలో వృషణాలు(Testicles) ఉన్నాయని తెలుసుకుని బిత్తరపోయింది. చివరకు ఆపరేషన్‌ ద్వారా వాటిని తొలగించుకుంది. చైనాలోని హుబీ(hubei ) ప్రావిన్స్‌లో ఈ విచిత్రం చోటు చేసుకుంది. సదరు యువతి పుట్టుకతో వచ్చే ఆడ్రినల్‌ గ్రంథి వ్యాధితో బాధపడుతున్నదని డాక్టర్లు అంటున్నారు. ఆమె యవ్వనంలో అడుగు పెట్టినప్పటికీ వక్షోజాల పెరుగుదల సరిగా లేకపోవడంతో డాక్టర్లను సంప్రదించారు. డాక్టర్లు క్రోమోజోముల పరీక్ష చేయించాలని సూచించారు. ఆ యువతి తల్లిదండ్రులు మాత్రం ఆ సూచనను పట్టించుకోలేదు. ఏప్రిల్‌లో పెళ్లికి ముందు వైద్య పరీక్షలు చేయించడంతో తమ కూతురు ఆడపిల్ల కాదని, పురుషుడని వారికి తెలిసింది.