Parrot Fever : యూరప్‌ దేశాల్లో విజృంభిస్తోన్న పారెట్‌ ఫీవర్‌.. అయిదుగురు మృతి

కొత్త కొత్త జబ్బులు పుట్టుకొస్తున్నాయి. మనుషులకు ప్రశాంతత లేకుండా చేస్తున్నాయి. ఐరోపా(Europe) దేశాలలో ఇప్పుడు పారెట్‌ ఫీవర్‌(Parrot Fever) స్వైర విహారం చేస్తోంది. ఈ వ్యాధి కారణంగా ఇప్పటికే అయిదుగురు చనిపోయారు. సిటాకోసిస్‌ అని పిల్చుకునే ఈ పారెట్‌ ఫీవర్‌ విషయంలో ప్రజలు అప్రమత్తంగా ఉండాలని ప్రపంచ ఆరోగ్య సంస్థ హెచ్చరించింది. యూరప్‌ దేశాల ప్రజలపై పారెట్‌ ఫీవర్‌ తీవ్ర ప్రభావం చూపుతున్నది. 2023 సంవత్సరారంభంలో ప్రజల కంటిమీద కునుకు లేకుండా చేసిన ఈ వ్యాధి ఇప్పుడు 2024 ఏడాది ఆరంభంలో అయిదుగురుని బలితీసుకుంది. గత ఏడాది ఆస్ట్రియాలో 14 పారెట్‌ ఫీవర్‌ కేసులు నమోదయ్యాయి. లేటెస్ట్‌గా మరో నాలుగు కేసులు నమోదయ్యాయి. ఫిబ్రవరి 27వ తేదీనాటికి డెన్మార్క్‌లో ఈ అంటువ్యాధికి సంబంధించిన 23 కేసులు వెలుగులోకి వచ్చాయని ప్రపంచ ఆరోగ్య సంస్థ తెలిపింది. డెన్మార్క్‌లో ఒక వ్యక్తిలో ఈ వ్యాధి కనిపించింది. ఈ ఏడాది ఇప్పటికే జర్మనీలో అయిదు కేసులను నిర్ధారించారు వైద్యులు. పెంపుడు జంతువులు, అడవి పక్షులతో అనుబంధం ఉన్నవారే ఎక్కువగా ఈ వ్యాధి బారిన పడుతున్నారని అమెరికా సెంటర్స్ ఫర్ డిసీజ్ కంట్రోల్ అండ్ ప్రివెన్షన్ చెబుతోంది. పారెట్‌ ఫీవర్‌ అనేది క్లామిడియా ఇన్ఫెక్షన్ కారణంగా సోకుతుంది. ఇది వివిధ రకాల అడవి జంతువులు, పెంపుడు పక్షులు, కోళ్లలో కనిపిస్తుంది. ఈ వ్యాధి సోకిన పక్షులు అనారోగ్యంగా కనిపించకపోవచ్చు. కానీ అవి శ్వాస వదిలినప్పుడు, లేదా మలవిసర్జన చేసినప్పుడు బ్యాక్టీరియాను విడుదల చేస్తాయి. ఈ కారణంగానే వ్యాధి త్వరితగతిన వ్యాపిస్తోందని వైద్య నిపుణులు అంటున్నారు.