Pak Police to search Imran's Residence : ఇమ్రాన్ ఇంట్లో ఉగ్రవాదులు.. నివాసాన్ని చుట్టుముట్టిన భద్రతా సిబ్బంది..

పాకిస్థాన్(Pakistan) మాజీ ప్రధాని ఇమ్రాన్ ఖాన్(Imran Khan) కష్టాలు రెట్టింపు అవుతున్నాయి. లాహోర్‌లోని పాకిస్థాన్ తెహ్రీక్-ఇ-ఇన్సాఫ్ (Pakistan Tehreek-e-Insaf) చైర్మన్ ఇమ్రాన్ ఖాన్ నివాసాన్ని భద్రతా సిబ్బంది చుట్టుముట్టారు. మీడియా కథనాల ప్రకారం.. పోలీసులు ఆయ‌న‌ను ఎప్పుడైనా అరెస్టు(Arrest) చేయవచ్చు. ఇమ్రాన్ ఇంట్లో ఉగ్రవాదులు దాక్కున్నట్లు పంజాబ్ ప్రభుత్వం(Punjab Govt) ప్రకటించింది. ఇమ్రాన్ నివాసంలో దాక్కున్న ఉగ్రవాదుల(Terrorists)ను పట్టుకునేందుకు పంజాబ్ పోలీసులు ఆప‌రేష‌న్ మొద‌లుపెట్టారు. భద్రతా బలగాలు ఇమ్రాన్ నివాసాన్ని చుట్టుముట్టాయి. ఇమ్రాన్ నివాసానికి వెళ్లే అన్ని మార్గాలను మూసివేశారు.

ఇమ్రాన్ నివాసంలో 30 నుంచి 40 మంది ఉగ్రవాదులు దాక్కున్నారని పంజాబ్ సమాచార శాఖ మంత్రి అమీర్ మీర్ పేర్కొన్నారు. ఈ వ్యక్తులు సైనిక స్థావరాలపై దాడులు చేశారని మంత్రి చెప్పారు. ఉగ్రవాదులను 24 గంటల్లో అప్పగించాలని ఇమ్రాన్‌ను హెచ్చరించారు. ఇమ్రాన్ ఖాన్‌కు ఇచ్చిన అల్టిమేటం గురువారం మధ్యాహ్నం 2 గంటలకు ముగిసింది.

పాకిస్తాన్ స్థానిక మీడియా ప్రకారం.. అమీర్ మీర్.. గురువారం ఇమ్రాన్ ఖాన్ నివాసంలో సెర్చ్ ఆపరేషన్(Search Operation) నిర్వహించి, అతని అనుమతి తర్వాత కెమెరాల ముందు ఉగ్రవాదులను పట్టుకుంటామని చెప్పారు. లాహోర్ కమిషనర్ పర్యవేక్షణలో ఇమ్రాన్ ఇంటికి ప్రతినిధి బృందాన్ని పంపనున్నారు.

మే 22 నుంచి కరాచీ నుంచి ఇస్లామాబాద్ వరకు 'సేవ్ పాకిస్థాన్' మార్చ్‌ను ప్రారంభించనున్నట్లు ధార్, తెహ్రీక్-ఎ-లబ్బైక్ పాకిస్థాన్ (Tehreek-e-Labbaik Pakistan) ప్రకటించింది. మార్చ్‌కు సిద్ధంగా ఉండాలని సంస్థ తన కార్యకర్తలను కోరింది. టీఎల్‌పీ చీఫ్ సాద్ హుస్సేన్ రిజ్వీ(Saad Hussain Rizvi) మాట్లాడుతూ.. కొంతమంది అహంకారానికి మొత్తం పాలనా యంత్రాంగాన్ని ఎలా బలి చేస్తున్నారో చూసి తాను ఆశ్చర్యపోయానని అన్నారు. ఈ దుస్థితికి ప్రభుత్వం, ప్రతిపక్షం రెండూ కారణమన్నారు.