Nawaz Sharif : నాలుగేళ్ల అజ్ఞాతవాసం తర్వాత స్వదేశానికి చేరుకున్న నవాజ్ షరీఫ్

పాకిస్థాన్ (Pakistan ) మాజీ ప్రధాని నవాజ్ షరీఫ్ (Nawaz Sharif) నాలుగేళ్ల అజ్ఞాతవాసం తర్వాత శనివారం పాకిస్థాన్‌కు తిరిగి వచ్చారు. గత నాలుగేళ్లుగా లండన్‌లో ఉంటున్న ఆయన అనారోగ్యంతో బాధపడుతూ అక్కడే చికిత్స పొందుతున్నారు. ఆయనకు స్వాగతం పలికేందుకు మాజీ న్యాయ మంత్రి సెనేటర్ అజం తరార్, పార్టీ నేతలతో సహా PML-N సుప్రీం లీగల్ టీమ్ విమానాశ్రయానికి చేరుకున్నారు. నవాజ్ రాగానే రాజకీయ, న్యాయపరమైన అంశాలపై సంప్రదింపులు జరుపుతామని తరార్ తెలిపారు.

మాజీ ప్రధాని, పాకిస్థాన్ ముస్లిం లీగ్-నవాజ్ (పీఎంఎల్-ఎన్) అధినేత నవాజ్ షరీఫ్ రాకకు ముందు లాహోర్‌లోని మినార్-ఎ-పాకిస్తాన్ వద్ద ఆయ‌న‌ మద్దతుదారులు గుమిగూడారు.

అంతకుముందు నవాజ్ షరీఫ్‌ను తీసుకెళ్లడానికి బుక్ చేసిన ప్రత్యేక విమానాన్ని పాకిస్తాన్ పౌర విమానయాన అథారిటీ (సిఎఎ) శుక్రవారం అనుమతించింది. కాగా, ఆయన తిరిగి వచ్చేందుకు ప్రత్యేక ఏర్పాట్లు చేస్తున్నారని ప్రతిపక్షాలు విమర్శించాయి. షరీఫ్ 2020లో బెయిల్ పొందినప్పటి నుంచి బ్రిటన్‌లో నివసిస్తున్నారు.

ఇస్లామాబాద్ హైకోర్టు ఇప్పటికే ఆయ‌న‌కు తాత్కాలిక ఉపశమనం కలిగించినందున.. ఆయ‌న పాకిస్తాన్‌కు తిరిగి వచ్చిన తర్వాత జైలుకు వెళ్లాల్సిన అవసరం లేదని పాకిస్తాన్ ముస్లిం లీగ్-నవాజ్ ఆశాభావం వ్యక్తం చేసింది. తోషాఖానా అవినీతి కేసులో ఆయన అరెస్టును కూడా కోర్టు తాత్కాలికంగా నిలిపివేసింది. షరీఫ్‌ను పాకిస్థాన్‌కు తీసుకురావడానికి పార్టీ నేతలు ప్రైవేట్ విమానాన్ని అద్దెకు తీసుకున్నారు.

మాజీ ప్రధాని ఇమ్రాన్ ఖాన్ పార్టీ తెహ్రీక్-ఇ-ఇన్సాఫ్.. నవాజ్ తిరిగి రావడాన్ని వ్యతిరేకించింది. కాగా, ఒక వ్యక్తి వ‌ల్ల‌ రాజ్యాంగం, ఎన్నికలు, ప్రజాస్వామ్యానికి విఘాతం కలిగిందని పాకిస్థాన్ పీపుల్స్ పార్టీ చీఫ్ బిలావల్ భుట్టో జర్దారీ అన్నారు.