Operation Ajay : ఇజ్రాయెల్ నుండి న్యూఢిల్లీకి చేరుకున్న మూడవ బ్యాచ్

ఇజ్రాయెల్(Israel)-హమాస్(Hamas) యుద్ధం నేప‌థ్యంలో 'ఆపరేషన్ అజయ్' కింద భారతీయ పౌరులను సురక్షితంగా తరలించే ఆపరేషన్ కొనసాగుతోంది. టెల్ అవీవ్ నుండి మూడవ బ్యాచ్ భారతీయులు ప్రత్యేక విమానంలో అర్థరాత్రి ఢిల్లీకి చేరుకున్నారు. ఈ బ్యాచ్‌లో 197 మంది భారతీయులు ఉన్నారు. కేంద్ర మంత్రి కౌశల్ కిషోర్(Kaushal Kishore) ఇజ్రాయెల్ నుండి వ‌చ్చిన‌ భారతీయ పౌరులకు విమానాశ్రయంలో స్వాగతం పలికారు. దేశ పౌరులకు సేవ చేసేందుకు ప్రధాని నరేంద్ర మోదీ(PM Narendra Modi) అంకితభావంతో ఉన్నారని అన్నారు. ప్రధాని అంకితభావం కారణంగా.. ఇజ్రాయెల్ నుండి భారతీయ పౌరులను సురక్షితంగా తరలించడం జరుగుతోంది. దేశానికి తిరిగి వచ్చిన తర్వాత అందరూ సంతోషంగా ఉన్నారని అన్నారు.

ఇజ్రాయెల్ నుండి తిరిగి వచ్చిన భారతీయ పౌరుడు మాట్లాడుతూ.. మేము భారత ప్రభుత్వానికి మా కృతజ్ఞతలు తెలియజేస్తున్నాము. మేము ఇజ్రాయెల్‌లో భయం నీడలో జీవించాం. ఆపరేషన్ అజయ్(Operation Ajay) చొరవకు మేము ప్రభుత్వానికి కృతజ్ఞతలు తెలియజేస్తున్నాము. ఇజ్రాయెల్ నుండి తిరిగి వచ్చిన భారత పౌరురాలు ప్రీతి శర్మ(Preeethi Sharma).. 'ఆపరేషన్ అజయ్' చొరవకు విదేశాంగ మంత్రి ఎస్ జైశంకర్‌(S Jai Shankar)కు ధన్యవాదాలు తెలిపారు. ఇది భారత ప్రభుత్వం యొక్క చాలా మంచి చొరవ అని నేను భావిస్తున్నాను. ఈ చొరవకు నేను విదేశాంగ మంత్రి జైశంకర్‌కి ధన్యవాదాలు చెప్పాలనుకుంటున్నాను. ఇజ్రాయెల్ నుండి భార‌త‌ పౌరులను తరలించడానికి మొదట ప్రచారాన్ని ప్రారంభించిన దేశాలలో భారతదేశం ఒకటి అని నేను భావిస్తున్నాను. మా కుటుంబ సభ్యులు చాలా సంతోషంగా ఉన్నారు. దీనికి మనమందరం చాలా కృతజ్ఞులం.

విదేశాంగ మంత్రి ఎస్ జైశంకర్ ట్విట్టర్‌లో ఒక పోస్ట్‌లో.. ఆపరేషన్ అజయ్ ముందుకు సాగుతోంది. 197 మంది భారతీయులతో కూడిన కొత్త బ్యాచ్ ప్రత్యేక విమానంలో తిరిగి వస్తోంది. టెల్ అవీవ్‌లోని బెన్ గురియన్ విమానాశ్రయం నుంచి రెండు ప్రత్యేక విమానాలు వ‌స్తాయని టెల్ అవీవ్‌లోని భారత రాయబార కార్యాలయం తెలియజేసింది. మొదటి విమానం స్థానిక కాలమానం ప్రకారం.. సాయంత్రం 5:40 గంటలకు బయలుదేరింది. అందులో 197 మంది ప్రయాణికులు ఉన్నారు. రెండవ విమానం స్థానిక కాలమానం ప్రకారం రాత్రి 11:00 గంటలకు బయలుదేరుతుంది. ఈ విమానం ఆదివారం ఉదయం భారత్‌కు చేరుకుంటుందని తెలిపారు.