ప్రైవేట్‌ వీడియోలతో సాఫ్ట్‌వేర్‌ ఉద్యోగి కుటుంబాన్ని బ్లాక్‌ మెయిల్‌ చేసిన డ్రైవర్..!

ప్రైవేట్‌ వీడియోలతో ఓ సాఫ్ట్‌వేర్‌ ఉద్యోగి కుటుంబాన్ని బ్లాక్‌మెయిల్‌ చేస్తున్న డ్రైవర్‌ను పోలీసులు అరెస్ట్ చేశారు. ప్రైవేట్‌ వీడియోలు చూపించి డబ్బులు డిమాండ్‌ చేస్తున్న కారు డ్రైవర్‌ అప్పలరాజును ద్వారకా పోలీసులు అరెస్టు చేశారు. సాఫ్ట్‌వేర్‌ ఇంజినీర్‌ చేకూరి గిరీష్, భార్య పిల్లలతో కలిసి సీతమ్మధార ఏరియాలో నివాసముంటున్నారు. అతనికి అంగవైకల్యం ఉండడంతో పిల్లలను చూసుకోవడానికి, ఇంటి పనుల కోసం డ్రైవర్‌గా రామెళ్ల అప్పలరాజును పెట్టుకున్నాడు. అప్పలరాజు నమ్మకంగా ఉండడంతో వారి మధ్య స్నేహం పెరిగింది. ఓ రోజు గిరీష్‌ను హోటల్‌కు తీసుకెళ్లి ఓ అమ్మాయిని పరిచయం చేశాడు. ఆమెతో సన్నిహితంగా ఉన్న దృశ్యాలను అప్పలరాజు మొబైల్‌లో చిత్రీకరించాడు. ఆ తర్వాత అప్పలరాజు అసలు రూపం బయటకు తన్నుకుంటూ వచ్చింది. ఆ వీడియోలతో గిరీష్‌ను బ్లాక్‌ మెయిల్‌ చేయడం ప్రారంభించాడు. తనకు రూ.లక్ష ఇవ్వాలని లేదంటే ఫొటోలు సోషల్‌ మీడియాలో, కుటుంబ సభ్యులకు పంపిస్తానని బెదిరించాడు. దీంతో పరువు పోతుందని భావించిన గిరీష్‌ తన బంధువు సిబ్బంది ద్వారా ఆ మొత్తాన్ని ఏర్పాటు చేసి ఆరు యూపీఐ లావాదేవీల ద్వారా డ్రైవర్‌కు బదిలీ చేశారు. చాలా కాలంగా గిరీష్‌తో పాటు అతని కుటుంబ సభ్యులను డ్రైవర్‌ అప్పలరాజు వేధించసాగాడు. ఎప్పటికప్పుడు డబ్బులు తీసుకుంటున్నాడు. ఐఫోన్‌16 ప్లస్‌ను కూడా ఇప్పించుకున్నాడు. ఈ ఏడాది ఫిబ్రవరిలో మరోసారి గిరీష్‌ను అప్పలరాజు కత్తితో బెదిరించి అతని వద్ద ఉన్న రూ.5 వేలు బలవంతంగా తీసుకున్నాడు. అలాగే గిరీష్‌ తన భార్య పేరు మీద కొనుగోలు చేసిన ఫ్లాట్‌ను కూడా కాజేసేందుకు ప్రయత్నించాడు. అంతటితో ఆగకుండా గిరీష్‌ వీడియోలు అతని భార్యకు పంపించి ఆమెను కూడా వేధించాడు. వీరి పార్కింగ్‌ స్థలాన్ని ఆక్రమించి అక్కడ పోలీస్‌ స్టిక్కర్‌ ఉన్న కారును పార్క్‌ చేసేవాడు. డ్రైవర్‌ అప్పలరాజు వేధింపులను భరించలేక గిరీష్‌ చివరకు ద్వారకా పోలీస్‌స్టేషన్‌లో ఫిర్యాదు చేశాడు. పోలీసులు అప్పలరాజును అరెస్టు చేసి రిమాండ్‌కు తరలించారు.