Rajasthan : బావిలో బాలిక మృత‌దేహం.. టీచ‌రే కిడ్నాప్ చేసి అత్యాచారం చేశాడ‌ని..

రాజస్థాన్‌(Rajastan)లో దారుణ ఘ‌ట‌న జ‌రిగింది. మైనర్‌ విద్యార్థిని కిడ్నాప్ చేసిన దుండ‌గులు త‌ర్వాత‌ హత్య చేసిన ఘ‌ట‌న‌ వెలుగులోకి వచ్చింది. సవాయ్ మాధోపూర్(Sawai Madhopur) జిల్లాలో 12వ తరగతి చదువుతున్న విద్యార్థిని మృతదేహం బావిలో కనిపించడంతో కలకలం రేగింది. మైనర్‌పై స్కూల్ టీచర్ అత్యాచారం చేసి ఆ తర్వాత హత్య చేసి ఉంటాడని స్థానికులు ఆరోపిస్తున్నారు.

నిందితుడిపై సవాయ్ మాధోపూర్‌లోని బౌల్లి పోలీస్ స్టేషన్‌లో అత్యాచారం, హత్య కేసు నమోదైంది. ప్రభుత్వ పాఠశాలలో చదువుతున్న 16 ఏళ్ల మైనర్ ఆగస్టు 8న అదృశ్యమైంది. ఈ విష‌య‌మై తండ్రి బాలిక స్కూల్ టీచర్ రామరతన్ మీనాపై ఫిర్యాదు చేశారు.

ఈ దారుణ ఘటనతో ఆగ్రహించిన బాలిక కుటుంబ సభ్యులు, బంధువులు, స్థానిక గ్రామస్తులు మృతదేహాన్ని పాఠశాల క్రీడామైదానంలో ఉంచి గురువారం నిరసనకు దిగారు. అంతే కాకుండా ప్రభుత్వం నుంచి నష్టపరిహారం చెల్లించాలని.. మొత్తం పాఠశాల సిబ్బందిని తొలగించాలని.. సీనియర్ పోలీసు అధికారులతో విచారణ జరిపి నిందితులను వెంటనే అరెస్టు చేయాలని డిమాండ్ చేశారు.

కుటుంబ సభ్యుల నిరసనతో పోస్టుమార్టం నిర్వహించలేకపోయారు. నిందితుడు టీచర్ రామరతన్ మీనాను అదుపులోకి తీసుకుని విచారిస్తున్నట్లు సర్కిల్ ఆఫీసర్ తెలిపారు. టీచర్ ను స్కూల్ నుంచి సస్పెండ్ చేసినట్లు తెలిపారు.

పాఠశాలలోని పురుష సిబ్బందిని కూడా తొలగించినట్లు సీవో తెలియజేసింది. ఈ ఘటనపై ప్రతిపక్ష పార్టీ బీజేపీ గెహ్లాట్ ప్రభుత్వంపై దాడి చేసింది. కాంగ్రెస్ ప్రభుత్వ హయాంలో రాష్ట్రంలో మహిళలపై నేరాలు పెరిగిపోయాయని రాజస్థాన్ శాసనసభలో ప్రతిపక్ష నేత రాజేంద్ర రాథోడ్ అన్నారు.