Tirumala Devasthanam : భక్తులకు టీటీడీ పలు కీలక సూచనలు

శ్రీవారి ఆలయంలో వైకుంఠ ద్వార దర్శనానికి వచ్చే భక్తులకు టీటీడీ(TTD) పలు కీలక సూచనలు(Guidelines) చేసింది. వైకుంఠ ద్వార దర్శనానికి వచ్చే భక్త్తుల సంఖ్య పెరగనుండటంతో ఆలయ అధికారులు పలు జాగ్రత్తలు తీసుకుంటున్నారు. ఈ పది రోజులు దాదాపు 8 లక్షల మంది భక్తులు వైకుంఠ ద్వార దర్శనం చేసుకొనే అవకాశం ఉంది. వైకుంఠ ద్వార దర్శనానికి తిరుమలకు వచ్చే భక్తులు సూచనలను
తప్పనిసరిగా పాటించాలని అధికారులు విజ్ఞప్తి చేశారు.

భక్తులకు టీటీడీ సూచనలు ఇవే :

* సర్వదర్శనానికి వచ్చే భక్తులు ఉచిత టైంస్లాట్ టోకెన్లు తీసుకోవడం ద్వారా తిరుమల క్యూలైన్లో ఎక్కువ సమయం వేచి ఉండకుండా దర్శనం చేసుకోవచ్చు. భక్తులు తిరుపతిలో టోకెన్లు తీసుకున్న తర్వాత మాత్రమే సర్వదర్శనానికి రావాలి.

* తిరుపతిలోని తొమ్మిది ప్రదేశాలలో ఏర్పాటుచేసిన 90 కౌంటర్లలో(Ticket counters) టికెట్లు ఇవ్వనున్నారు.

* ఈ కౌంటర్లలో డిసెంబరు 23, 2023 నుంచి జనవరి1, 2024 వరకు 10 రోజులకుగాను.. డిసెంబరు 22న మధ్యాహ్నం 2 గంటల నుండి 4,23,500 టోకెన్ల కోటా పూర్తయ్యేంత వరకు పైన పేర్కొన్న 92 కౌంటర్లలో నిరంతరాయంగా ఇస్తారు.

* దర్శనం టోకెన్లు లేని భక్తులు తిరుమలకు రావచ్చు. కానీ.. వారికి దర్శనం ఉండదు.

* టి.టి.డి. వెబ్సైట్, ఎస్వీబీసీ ఇతర మాధ్యమాల ద్వారా టికెట్ల లభ్యతను తెలుసుకున్నాకే భక్తులు తిరుమల ప్రయాణాన్ని ఖరారు చేసుకోవాలి.

* తిరుమలలో వసతి గృహాలు పరిమితంగా ఉన్న కారణంగా భక్తులు తమ టోకెన్ పై సూచించిన తేదీ, సమయానికే తిరుమలకు రావాలి.

* ఈ పర్వదినాలలో భక్తుల రద్దీ దృష్ట్యా తిరుపతిలో గదులు పొందాల్సిందిగా భక్తులకు విజ్ఞప్తి చేస్తున్నాం. ఎక్కువ మంది సామాన్య భక్తులకు వైకుంఠ ద్వార దర్శనం కల్పించడం కోసం ఎప్పటిలాగే ఈ ఏడాది కూడా స్వయంగా వచ్చే ప్రొటోకాల్ విఐపీలకు పరిమితంగా మాత్రమే బ్రేక్ దర్శనం ఇవ్వబడుతుంది. ఈ 10 రోజులు సిఫారసు లేఖలు స్వీకరించబడవు.

* వైకుంఠ ద్వార దర్శనం 10 రోజుల పాటు ఉంటుంది. కావున వివిపీలు, ఇతర భక్తులు తొలిరోజైన వైకుంఠ ఏకాదశి రోజు మాత్రమే దర్శనం చేసుకోవాలనే తొందరపాటు వద్దు. పది రోజుల్లో ఏదో ఒక రోజు దర్శనం చేసుకోవడానికి ప్రణాళికలు రూపొందించుకోవాల్సిందిగా కోరడమైనది.