Female Government Teacher: రోడ్డు ప్రమాదంలో మహిళా టీచర్ మృతి..!

మంచి ఉద్యోగం, ఇష్టమైన వ్యక్తితో పెళ్లి.. ఇద్దరు పిల్లలతో సాఫీగా సాగిపోతున్న మహిళా టీచర్ అకాల మరణం చెందింది. ఎదురుగా వస్తున్న వాహనం తప్పిదంతో తాను నడుపుతున్న స్కూటీని డీకొట్టింది. దీంతో మహిళా టీచర్ అక్కడిక్కడే మృతి చెందింది. కోటబొమ్మాళి( Kotabommali) మండలం పాకివలస గ్రామ సమీప జాతీయ రహదారిపై బుధవారం జరిగిన రోడ్డు ప్రమాదంలో టెక్కలి మండలం సన్యాసిపేట ప్రభుత్వ పాఠశాలలో పనిచేస్తున్న ఉపాధ్యాయురాలు సంపతిరావు త్రివేణి మృతి చెందింది. సంపతిరావు త్రివేణి(sampatirao Triveni) సొంతూరు ఆమదాలవలస మండలం తిమ్మాపురం(Timmapuram) గ్రామం. చిత్తూరు జిల్లాలో పనిచేసేది.. అయితే మ్యూచువల్ ట్రాన్స్‌ఫర్‌తో ఏడాది కిందటే టెక్కలి మండలం సన్యాసిపేట ప్రభుత్వ స్కూల్‌లో విధులు నిర్వహించేది. స్వగ్రామం నుంచి స్కూల్‌కు రోజు వెళ్లి వచ్చేది. తిమ్మాపురం నుంచి కోటబొమ్మాళి వరకు బస్సులో ప్రయాణించి అక్కడ ఉంచిన స్కూటీమీద స్కూల్‌కు వెళ్లేది. ఈ క్రమంలో బుధవారం కూడా కోటబొమ్మాలి నుంచి టెక్కలికి స్కూటీపై బయల్దేరింది. పలాస నుంచి శ్రీకాకుళం వైపు వెళ్తున్న కారు జాతీయ రహదారిపై అతివేగంగా వచ్చి డివైడర్‌ను ఢీకొట్టి అవతలివైపు వెళ్తున్న త్రివేణి స్కూటీని ఢీకొట్టింది. ప్రమాదం అతి తీవ్రత కావడంతో త్రివేణి అక్కడిక్కడే మృతి చెందింది. కారులో ఉన్న ఇద్దరు స్వల్పగాయాలతో బయటపడ్డారు. త్రివేణి ఏడేళ్ల కిందట ప్రేమ వివాహం చేసుకోగా వీరికి ఇద్దరు ఆడ పిల్లలు ఉన్నారు. టీచర్‌ చనిపోయారని తెలిసి సన్యాసిపేట వాసులు ఘటనా స్థలానికి చేరుకుని రోదించారు. కోటబొమ్మాళి పోలీసులు కేసు నమోదు చేసుకున్నారు.