Telangana : తెలంగాణ బీజేపీ అధ్యక్ష పదవి ఎందుకు ఆలస్యమవుతోంది..!

తెలంగాణ బీజేపీ అధ్యక్ష పదవికి కొత్త పేరును ఖరారు చేయడంలో ఆలస్యం జరగడానికి కొన్ని కీలక కారణాలు ఉన్నాయని రాజకీయ విశ్లేషకులు భావిస్తున్నారు. ప్రస్తుత అధ్యక్షుడు జి. కిషన్ రెడ్డి, కేంద్ర మంత్రిగా తన విధులతో బిజీగా ఉండటం వల్ల, పార్టీ కార్యకలాపాలకు పూర్తి సమయం కేటాయించలేకపోతున్నారు. 2023 జులైలో ఆయన ఈ పదవిని తాత్కాలికంగా చేపట్టినప్పటికీ, ఇప్పటివరకు కొత్త అధ్యక్షుడిని నియమించే ప్రక్రియ పూర్తి కాలేదు. దీనికి కారణం, బీజేపీ జాతీయ నాయకత్వం మహారాష్ట్ర, జార్ఖండ్ అసెంబ్లీ, ఢిల్లీ ఎన్నికలపై దృష్టి సారించారు. ఇంకో వైపు, తెలంగాణలో పార్టీని బలోపేతం చేయాలంటే, అన్ని వర్గాలను కలుపుకుని, స్థానికంగా బలమైన ఇమేజ్ ఉన్న నాయకుడిని ఎన్నుకోవాలి. ఈ పదవికి ఎంపీలు ఈటల రాజేందర్, ధర్మపురి అరవింద్, రఘునందన్ రావు, రామచంద్రమూర్తి, ఆచారి వంటి వారి పేర్లు ప్రచారంలో ఉన్నాయి, కానీ వీరిలో ఎవరిని ఎంచుకోవాలన్న దానిపై ఏకాభిప్రాయం కుదరడం లేదు. కొందరు పాత నాయకులు దీర్ఘకాలంగా పార్టీలో ఉన్నవారికే అవకాశం ఇవ్వాలని, మరికొందరు కొత్తగా చేరిన వారిని పరిగణనలోకి తీసుకోవాలని వాదిస్తున్నారు. ఈ అంతర్గత చర్చలు కూడా ఆలస్యానికి దారితీస్తున్నాయి. అయితే బండి సంజయ్‌(bandi sanjay) కేంద్ర మంత్రిగా బాధ్యతలు చేపట్టిన రోజే బీజేపీకి కొత్త అధ్యక్షుడిని ప్రకటిస్తారని, అది ఈటెల రాజేందర్‌(Eatala Rajender) అనే వార్తలు వచ్చాయి. కానీ 9 నెలలు గడిచినా ఇది ఇంకా పూర్తి కాలేదు. కొత్తగా బీజేపీలో చేరడం, ఈటెల రాజేందర్‌కు బీజేపీ ఐడియాలజీ లేదని, ఆయన మాజీ మావోయిస్టు అని, ఏనాడూ జై శ్రీరాం అనని అతనికి బీజేపీ రాష్ట్ర అధ్యక్షుడిని ఎలా ఇస్తారని కొందరు నేతలు ఇంటర్నల్‌గా వాదిస్తున్నారని సమాచారం. అంతేకాదు, పార్టీ సంస్థాగత ఎన్నికల ప్రక్రియ బూత్ స్థాయి నుంచి జిల్లా స్థాయి వరకు పూర్తి కావాల్సి ఉంది. ఈ ప్రక్రియ తర్వాతే రాష్ట్ర అధ్యక్షుడి ఎంపిక సాధారణంగా జరుగుతుంది. ఇప్పటికే ఈ ఎన్నికలు కొంత ఆలస్యంగా సాగుతుండటం కూడా ఓ కారణం. జాతీయ అధ్యక్షుడు జె.పి. నడ్డా పదవీ కాలం పొడిగింపు, ఆ తర్వాత కొత్త జాతీయ అధ్యక్షుడి ఎంపిక కూడా రాష్ట్ర స్థాయి నిర్ణయాలపై ప్రభావం చూపుతోంది.ఏప్రిల్ చివరి నాటికి లేదా ఏదో ఒక నిర్ణయం వచ్చే అవకాశం ఉందని విశ్లేషకులు అంచనా వేస్తున్నారు.