Trump Administration : అమెరికాలో బిక్కుబిక్కుమంటున్న 3 లక్షల మంది విద్యార్థులు..!

అమెరికాలో మాస్టర్స్ డిగ్రీ పూర్తి చేసిన అంతర్జాతీయ విద్యార్థులకు ఇచ్చే ఆప్షనల్ ప్రాక్టికల్ ట్రైనింగ్ (OPT) విధానాన్ని రద్దు చేసేందుకు ట్రంప్ ప్రభుత్వం ప్లాన్ చేస్తోందనే వార్తలు వస్తున్నాయి. ట్రంప్ తొలిసారి అధ్యక్షుడిగా ఉన్నప్పుడు ఇమ్మిగ్రేషన్ విధానాలను కఠినతరం చేసేందుకు పలు చర్యలు తీసుకున్నారు. OPT విధానం విదేశీ విద్యార్థులు, ముఖ్యంగా భారతీయులు, చైనీయులు సైన్స్, టెక్నాలజీ, ఇంజనీరింగ్, మ్యాథమెటిక్స్ రంగాల్లోని వారు అమెరికాలో పని అనుభవం పొందేందుకు ఉపయోగపడుతుంది. 2020లో, ట్రంప్ పరిపాలన OPT ప్రోగ్రామ్‌పై పరిమితులు విధించేందుకు ప్రయత్నించినా అమలులోకి రాలేదు.

తాజాగా అమెరికన్ కాంగ్రెస్‌లో OPT ప్రోగ్రామ్‌ను రద్దు చేసేందుకు ఒక బిల్ ప్రతిపాదన ఉందని వార్తలు వస్తున్నాయి.

OPT (ఆప్షనల్ ప్రాక్టికల్ ట్రైనింగ్) విధానం రద్దు అయితే, అమెరికాలో ఉన్నత విద్యను అభ్యసించే అంతర్జాతీయ విద్యార్థులు, ముఖ్యంగా భారతదేశం నుంచి వెళ్లే విద్యార్థులు తీవ్రంగా ప్రభావితం అవుతారు. భారతీయ విద్యార్థులు ముఖ్యంగా తెలుగు విద్యార్థులు అమెరికాలో మాస్టర్స్ డిగ్రీలు MS, MBA చదివే విద్యార్థుల్లో భారతీయులు, అందులోనూ ఆంధ్రప్రదేశ్, తెలంగాణా నుంచి వెళ్లే వారు ఎక్కువ సంఖ్యలో ఉన్నారు. OPT వారికి చదువు పూర్తయిన తర్వాత 12 నెలల పాటు (STEM విద్యార్థులైతే 36 నెలల వరకు) అమెరికాలో పని చేసే అవకాశాన్ని ఇస్తుంది. ఇది రద్దు అయితే, వారు ఉద్యోగ అనుభవం పొందే అవకాశాన్ని కోల్పోతారు. H-1B వీసా కోసం దరఖాస్తు చేసే అవకాశం కూడా తగ్గుతుంది. దీనివల్ల వారి కెరీర్ లక్ష్యాలు, అమెరికాలో స్థిరపడాలనే ఆశలు దెబ్బతింటాయి. సైన్స్, టెక్నాలజీ, ఇంజనీరింగ్, మ్యాథమెటిక్స్ (STEM) రంగాల్లో చదివే విద్యార్థులు OPT ద్వారా 36 నెలల వరకు పని చేసే అవకాశం పొందుతారు. ఈ సమయంలో వారు పరిశ్రమలో అనుభవం సంపాదించి, ఉద్యోగాల కోసం పోటీపడతారు. OPT రద్దు అయితే, ఈ విద్యార్థులు చదువు పూర్తయిన వెంటనే దేశం విడిచి వెళ్లవలసి వస్తుంది, దీనివల్ల వారి వృత్తిపరమైన భవిష్యత్తు ప్రమాదంలో పడుతుంది.

చాలా మంది తల్లిదండ్రులు తమ పిల్లలను అమెరికాకు పంపడానికి పెద్ద మొత్తంలో రుణాలు తీసుకుంటారు. OPT ద్వారా విద్యార్థులు ఉద్యోగం సంపాదించి ఆ రుణాలను తీర్చడానికి సహాయపడతారు. ఇది లేకుండా పోతే, కుటుంబాలపై ఆర్థిక భారం పెరుగుతుంది. ఈ విధానం రద్దు అయితే, కంపెనీలకు నైపుణ్యం గల ఉద్యోగుల కొరత ఏర్పడే అవకాశం ఉంది, ఇది వాటి ఉత్పాదకత, ఆర్థిక వృద్ధిని ప్రభావితం చేయవచ్చు. అంతర్జాతీయ విద్యార్థులు అమెరికాలోని విశ్వవిద్యాలయాలకు పెద్ద ఆదాయ వనరు. OPT రద్దు అయితే, అమెరికాలో చదవడానికి వచ్చే విద్యార్థుల సంఖ్య తగ్గి విశ్వవిద్యాలయాల ఆదాయం మీద ప్రభావం పడవచ్చు. ఇది విద్యార్థుల కెరీర్ అవకాశాలను దెబ్బతీసే ప్రమాదం మాత్రమే కాక, అమెరికా ఆర్థిక వ్యవస్థపై కూడా పరోక్ష ప్రభావం చూపవచ్చు.